Hasköy Mahkemesi 10 Numaralı Sicil (H. 1085 - 1090 / M. 1674 - 1679) cilt: 30, sayfa: 42 Hüküm no: 7 Orijinal metin no: [6-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Edirne’de kuyumcu iken ölen Yorgo v. Yamandi’nin vârislerinin Rali v. Kostantin zimmetinde kalan alacağı talep ettikleri Havâss-ı Aliyye kazâsı müzâfâtından kasaba-i Hasköy’de Kiremitçi Ahmed Çelebi mahallesi sükkânından olup hâlâ mahrûse-i Edirne’de kuyumcu iken bundan akdem hâlik olan Yorgo v. Yamandi nâm zimmînin verâseti anası Saltane bt. ( ) nâm Nasrâniye ile li-ebeveyn er karındaşı Üskuli ve kız karındaşı Sünbüle’ye münhasıra olduğu lede’ş-şer‘i’ş-şerîf zâhir ve müte‘ayyin oldukdan sonra bâ‘is-i hâze’l-vesîka mezbûre Saltane ile merkūmân Üskuli ve Sünbüle meclis-i şer‘-i şerîfde Rali v. Kostantin mahzarında her biri üzerine da‘vâ ve takrîr-i kelâm edip mûrisimiz hâlik-i merkūmun mezbûr Rali zimmetinde cihet-i karz-ı şer‘îden on esedî guruş hakkı olup kable’l-ahz mürd olmağla merkūm Rali zimmetinde kalmağın hâlâ verâset-i mahkiyemiz hasebiyle taleb eylediğimizde edâdan imtinâ‘ eder suâl olunup edâsına tenbîh olunmak matlûbum[uz]dur dediklerinde gıbbe’s-suâl mersûm Rali cevâbında fi’l-hakīka cihet-i mezbûreden meblağ-ı mersûm on esedî guruş hâlik-i merkūma deynim vardır deyû tav‘an ikrâr lâkin müdde‘iyûn-ı mezbûrûn hâlik-i merkūmun minvâl-i muharrer üzre her biri vârisi olduğu ma‘lûmum değildir deyû [7] inkâr ile cevâb vericek müdde‘iyûn-ı mezbûrûndan takrîrlerine mutâbık beyyine taleb olundukda yine kasaba-i mezbûrede mahalle-i mezbûre sükkânından İbrahim Beşe b. Abdünnebi ve Mehmed Bey b. Ali ve Ahmed b. Mehmed nâm kimesneler li ecli’ş-şehâde meclis-i şer‘a hâzırûn olup istişhâd olunduklarında fi’l-hakīka hâlik-i merkūm müdde‘iyûn-ı mezbûre Saltane’nin sadrî oğludur mersûmân Üskuli ve Sünbüle karındaşları olup anaları ismi mezbûre Saltane’dir ve babaları ismi mezbûr Yamandi’dir ve dedeleri ismi Harmestodi ve maskat-ı re’sleri mahalle-i mezbûredir biz bu husûsa bu vech üzre şâhidleriz şehâdet dahi ederiz deyû her biri edâ-yı şehâdet-i şer‘iyye eylediklerinde gıbbe’t-ta‘dîl ve’t-tezkiyye şehâdetleri makbûle olmağın mûcebiyle meblağ-ı mezbûru müdde‘iyûn-ı mezbûrûna edâya mersûm Rali’ye ba‘de’t-tenbîh yine kazâ-i mezbûreye tâbi‘ Küçükçekmece’de hâlâ hâlik-i mezbûrun muhallefât-ı metrûkesini vâzı‘ü’l-yed olandan ahz ü kabza ve lede’l-hükkâmi’l-kirâm murâfa‘a ve muhâsamaya mezbûre Saltane kendi asâleten ve mezbûre Sünbüle tarafından kezâlik ba‘de’l-murâfa‘ati’ş-şer‘iyye muhallefât-ı mezkûreyi ahz ü kabza ve kendiye îsâle vekîl nasb ve ta‘yîn eyledikde mezbûr Rali dahi vekâlet-i mersûmeyi kabûl ve hıdemât-ı lâzımesini edâya müte‘ahhid olmağın mâ hüve’l-vâki‘ bi’t-taleb ketb olundu. Fi’l-yevmi’s-sânî ve’l-ışrîn min Şevvâli’l-mükerrem li sene hamsîn ve semânîn ve elf. Şuhûdü’l-hâl: Ali Beşe b. Muharrem, Ali Beşe b. Musa, Mehmed b. Mahmud, Ömer Beşe b. Osman, İbrahim? Çelebi b. Dilâver, Mahmud Bey el-Muhzır?