Hasköy Mahkemesi 10 Numaralı Sicil (H. 1085 - 1090 / M. 1674 - 1679) cilt: 30, sayfa: 43 Hüküm no: 8 Orijinal metin no: [7-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Derviş Mehmed Efendi’nin Turşucuzâde Camii imamlığıyla mektep hocalığı için İbrahim Halife’yi yerine vekil tayin ettiği Havâss-ı Aliyye kazâsı müzâfâtından kasaba-i Hasköy’de merhûm Turşucuzâde Hüseyin Çelebi mahallesinde sâkin Derviş Mehmed Efendi b. Mustafa nâm kimesne meclis-i şer‘-i hatîr-i lâzımü’t-tevkīrde hâfız-ı hâze’l-kitâb İbrahim Halîfe b. Murad nâm kimesne mahzarında ikrâr ve takrîr-i kelâm edip mahalle-i mezbûrede vâki‘ meşrûtiyyet üzre imâm ve hatîb olduğum mârrü’z-zikr merhûm Turşucuzâde Hüseyin binâ eylediği câmi‘-i şerîfde evkāt-ı hamse ve ta‘lîm-i sıbyân hizmetini yevmî beş akçe ücret ve mahalle-i mezbûrede vâki‘ imâma meşrût olan menzilde mezbûr İbrahim Halîfe sâkin olmak vechi üzre tarafımdan kāimma[kā]m [8] ve menâbıma nâib nasb ve ta‘yîn eyledim ol dahi vech-i muharrer üzre hizmet-i lâzımesini edâya ta‘ahhüd eyledi dedikde mukırr-ı mezbûrun takrîrini mezbûr İbrahim Halîfe bi’l-muvâcehe tasdîk [ve] bi’l-müşâhede tahkīk etmeğin mâ vaka‘a bi’t-taleb ketb olundu. Hurrire fi’l-yevmi’s-sâdis ve’l-ışrîn min Şevvâli’l-mükerrem li sene hamsîn ve semânîn ve elf. Şuhûdü’l-hâl: Abdülbâkī Efendi b. Ahmed, Mehmed Efendi b. Mustafa el-İmâm, Mehmed Çelebi b. Siyavuş, Mustafa Çelebi [b.] Dilâver, İbrahim Çelebi b. Ömer, Mehmed Çelebi b. Hüseyin, diğer Mehmed Çelebi b. Mustafa, Nasuh Halîfe b. Ali, Mustafa Çelebi b. Mehmed el-Müezzin, Ali Beşe b. Abdullah, Dilâver Bey b. Abdullah, İbrahim Çelebi b. Dilâver, Mahmud Çelebi b. Mehmed, Ahmed Çavuş el-Muhzır