Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 111 Hüküm no: 68 Orijinal metin no: [14b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatıma bt. Hasan’ın Sâkine Hatun Vakfı mütevellisi Receb aleyhindeki menzil davasında anlaştıkları Mahmiye-i İstanbul’da Sofular mahallesi sükkânından olup bundan akdem Girid Cezîresi’nde vefât eden Mehmed Odabaşı’nın li-ebin kız karındaşı ve hasren vârisesi Fâtıma bt. Hasan nâm hatun meclis-i şer‘-i hatîr-ı lâzımü’t-tevkīrde merhûm Sâkine Hatun Vakfı’na hâlâ mütevellî olan işbu bâ‘isü’l-kitâb el-Hâc Receb b. Ali nâm kimesne mahzarında ikrâr ve takrîr-i kelâm edip vakf-ı mezbûrdan mahalle-i mezbûrede vâki‘ iki tarafdan vakf-ı mezbûra ve bir tarafdan Cafer Çelebi Vakfı’na ve bir tarafdan tarîk-i âmma müntehî arsa-i hâliye icâre-i mu‘accele-i ma‘lûme ve beher şehr otuz beş akçe icâre-i müeccele ile mûrisim müteveffâ-yı mezbûr ile vâlidesinin kız karındaşı gāibetü ani’l-meclis Fâtıma nâm hatun ile iştirâk-i seviyy üzere tasarruflarında olmağla kız karındaşım mezbûr ve şerîkesi merkūme Fâtıma arsa-i hâliye-i mezbûre üzerine izn-i mütevellî ile icâre-i mu‘accelelerine mahsûb olmak üzere iştirâken mâlları ile müceddeden bir bâb fevkānî oda ve sofa binâ edip tasarruflarında iken mûrisim mezbûr bi-emrillâhi te‘âlâ cezîre-i mezbûrede vefât edip evlâdı kalmamağla mütevellî-yi merkūm ebniye-i meşrûhanın nısf-ı şâyi‘ini vakıf için zabt ve işbu hâzır bi’l-meclis Hasan Beşe b. Abdullah nâm kimesne’ye icâre-i [15a] mu‘accele-i ma‘lûme ve icâre-i müeccel-i mezkûre ile îcâr ve teslîm etmekle ben dahi mûrisim mezbûrun arsa-i mezbûre üzerine mu‘accelesine mahsûb olmak üzere masrûfu olan meblağ-ı ma‘lûmü’l-mikdârı kable’l-istîfâ vefât etmişdir deyü minvâl-i merkūm üzerine da‘vâ ve izn-i şer‘î ile ba‘de’l-keşf istîfadan ziyâdeyi taleb etmiş idim. El-hâletü hâzihi beynimize muslihûn tavassut edip sulh, vakf-ı mezbûra enfa‘ olmağla beni mütevellî-i mezbûr ile da‘vâ-yı meşrûhamdan yedi yüz elli akçe üzerine sulh eylediklerinde ben dahi sulh-ı mezbûru kabûl ve bedel-i sulh olan meblağ-ı mezbûr yedi yüz elli akçeyi mâl-ı vakf-ı mezbûrdan mütevellî-yi merkūm yedinden tamâmen ahz u kabz edip da‘vâ-yı mezkûrumdan berî oldum. Min-ba‘d mütevellî-yi mezbûr ile müste’cir-i merkūm Hasan Beşe’nin üzerine bi-vechin mine’l-vücûh da‘vâ ve husûmetim yokdur dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’s-sâlis aşer min-Cumâdelâhire li-sene ihdâ ve semânîn ve elf. Şuhûdü’l-hâl: el-Hâc Beşir b. Abdullah, Mehmed Çelebi b. Emrullah, Mahmud Çelebi b. ( ), İbrahim Çelebi b. Ahmed, Hasan Beşe b. Mahmud.