Hasköy Mahkemesi 10 Numaralı Sicil (H. 1085 - 1090 / M. 1674 - 1679) cilt: 30, sayfa: 47 Hüküm no: 13 Orijinal metin no: [11-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âişe bt. Hasan’ın muhtelif oda ve ayazmadaki hissesini diğer Âişe bt. Hasan’a sattığı Mahmiye-i İstanbul’da Kumkapı dâhilinde Süleyman Ağa mahallesinde sâkine Âişe bt. Hasan nâm hâtun tarafından bey‘-i âti’l-beyânı ikrâra vekîl olup mezbûrenin zâtını ma‘rifet-i şer‘le ârifân olan Mehmed Efendi b. Osman ve Kalenderî Mehmed Çelebi b. Ömer nâm kimesneler şehâdetleri ile şer‘an vekâleti sâbite olan mezbûrenin zevci Sinan Bey b. Hasan nâm kimesne meclis-i şer‘-i hatîr-i lâzımü’t-tevkīrde râfi‘atü’l-kitâb diğer Âişe bt. Hasan nâm hâtun mahzarında bi’l-vekâle ikrâr ve i‘tirâf edip müvekkilem mezbûre Âişe Havâss-ı Aliyye kazâsı müzâfâtından kasaba-i Hasköy mahallâtından Pîrî Paşa mahallesinde vâki‘ bir tarafdan Kapudân kızı demekle ma‘rûfe Kerime nâm hâtun mülkü ve bir tarafdan Aslan ve Avraham nâm Yahudiler mülkleri ve iki tarafdan tarîk-ı hâs ile mahdûd olup ayazmayı müştemil olan büyût-ı müte‘addideden bundan esbak vefât eden vâlidesi Emine Hâtun’dan bi hasebi’l-irsi’ş-şer‘î intikāl ve isâbet eden hisse-i şâyi‘asını mezbûre diğer Âişe’ye dört bin altı yüz fıddî râyic fi’l-vakt akçeye tarafeynden îcâb ve kabûlü hâvî bey‘-i kat‘î ile bey‘ ve teslîm eyledi ol dahi vech-i muharrer üzre iştirâ ve tesellüm ve kabz eyledikden sonra semeni olan meblağ-ı mersûm dört bin altı yüz akçeyi müşteriye-i mezbûre diğer Âişe yedinden tamâmen ahz ü kabz eyledi ba‘de’l-yevm hudûd-ı mezkûr ile mahdûd olan sâlifü’z-zikr büyût-ı müte‘addidede ve ayazmada olan müvekkile-i mezbûrenin hisse-i şâyi‘ası mezbûre diğer Âişe’nin mülk-i müşterâsıdır keyfe mâ yeşâ’ ve yahtâr mutasarrıfe olsun dedikde müşteriye-i mezbûre diğer Âişe vekîl-i merkūm Sinan Bey’i vicâhen tasdîk ve şifâhen tahkīk etmeğin mâ hüve’l-vâki‘ bi’t-taleb ketb olundu. Hurrire fi’l-yevmi’s-sânî aşer min Zilka‘deti’ş-şerîfe li sene hamsîn ve semânîn ve elf. Şuhûdü’l-hâl: Abdülbâkī Efendi b. Ahmed, Ahmed Efendi b. İsa, Hüseyin Ağa b. Muharrem, Yusuf Ağa b. Hasan, Ramazan b. Abdullah, Mehmed Efendi? el-İmâm?, Mehmed Çelebi el-Müezzin, …?, ..?