Hasköy Mahkemesi 10 Numaralı Sicil (H. 1085 - 1090 / M. 1674 - 1679) cilt: 30, sayfa: 48 Hüküm no: 14 Orijinal metin no: [12-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âişe bt. Hasan’ın muhtelif oda ve ayazmadaki hissesini Sarasenyora bt. Salamon’a sattığı Havâss-ı Aliyye kazâsı müzâfâtından kasaba-i Hasköy mahallâtından Kiremitçi Ahmed Çelebi mahallesinde sâkine Âişe bt. Hasan nâm hâtun meclis-i şer‘-i hatîr-i lâzımü’t-tevkīrde hâfızatü’l-vesîka Sarasenyora bt. Salamon nâm Yahudiye muvâcehesinde ikrâr ve i‘tirâf edip akd-i âti’z-zikrin sudûruna değin silk-i mülk-i sahîhimde münselik olup kasaba-i mezbûre mahallâtından Pîrî Paşa mahallesinde vâki‘ bir tarafdan Kapudân kızı demekle ma‘rûfe Kerime nâm hâtun mülkü ve bir tarafdan Aslan ve Avraham nâm Yahudiler mülkleri ve iki tarafdan tarîk-ı hâs ile mahdûd olup babam müteveffâ-yı merkūm Hasan ile er karındaşım Mehmed Çelebi nâm müteveffâdan bana bi hasebi’l-irsi’ş-şer‘î intikāl ve isâbet eden hisse-i şâyi‘amı ve bundan [akdem] vefât eden li-ebeveyn kız karındaşım Emine nâm hâtunun sulbiye kebîre kızı gāibe ani’l-meclis Âişe nâm hâtundan dört bin altı yüz akçeye iştirâ eylediğim hisse-i şâyi‘amı mezbûre Sarasenyora’ya tarafeynden îcâb ve kabûlü hâvî bey‘i kat‘î ile kırk üç [bin] dört yüz fıddî râyic fi’l-vakt akçeye bey‘ ve teslîm edip ol dahi minvâl-i muharrer üzre iştirâ ve tesellüm ve kabz eylediğinden sonra semeni olan meblağ-ı mersûm kırk üç [bin] dört yüz fıddî râyic fi’l-vakt akçeyi müşteriye-i mezbûre Sarasenyora yedinden tamâmen ahz ü kabz eyledim ba‘de’l-yevm hudûd-ı mezkûr ile mahdûd olan sâlifü’z-zikr büyût-ı müte‘addide ve ayazma mezbûre Sarasenyora’nın mülk-i müşterâsı olmuşdur keyfe mâ yeşâ’ ve yahtâr mutasarrıfe olsun dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Hurrire fi’l-yevmi’l-hâmis aşer min Zilka‘deti’ş-şerîfe li sene hamsîn ve semânîn ve elf. Şuhûdü’l-hâl: es-Seyyid Ahmed Efendi b. es-Seyyid Hasan, Abdülbâkī Efendi b. Ahmed, Ahmed Efendi b. İsa, Osmanzâde Mehmed Efendi, Hüseyin Ağa b. Muharrem, Mehmed Efendi el-İmâm, Mehmed Çelebi el-Müezzin, Mehmed Çelebi Kalenderî, Ramazan Bey [b.] Abdullah ve gayruhüm