Hasköy Mahkemesi 10 Numaralı Sicil (H. 1085 - 1090 / M. 1674 - 1679) cilt: 30, sayfa: 48 Hüküm no: 15 Orijinal metin no: [12-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sarasenyora bt. Salamon’un elinde bulunan odalar ile ayazmayı kardeşlerinin miras iddiasına karşılık Âişe Hâtun’dan satın aldığını söylediği ve sulh oldukları Tahakkuk-ı özr-i şer‘î ile husûsu âti’l-beyânı mahallinde tahrîri iltimâs olunmağın bu fakīr zeyl-i kitâbda muharrerü’l-esâmî olan müslimîn ile Havâss-ı Aliyye kazâsı müzâfâtından kasaba-i Hasköy mahallâtından Pîrî Paşa mahallesinde vâki‘ sâbıkan Anadolu [13] kazaskeri olan a‘lemü’l-ulemâ’i’l-mütebahhirîn efdalü’l-fuzalâ’i’l-müteverri‘în yenbû‘ü’l-ilmi ve’l-fazli ve’l-yakīn hüccetü’l-hakkı ale’l-halki ecma‘în vârisü ulûmi’l-enbiyâ’i ve’l-mürselîn Mustafa Efendi hazretlerinin odalarına varılıp akd-i meclis-i şer‘-i şerîf olundukda yine mahalle-i mezbûre sâkinlerinden Sinyora cemâ‘atinden Avraham ve Manol veledey Aslan nâm Yahudiler meclis-i ma‘kūd-ı mezkûrda râfi‘atü’l-vesîka Sarasenyora bt. Salamon nâm Yahudiye muvâcehesinde her biri ikrâr ve i‘tirâf edip mersûme Sarasenyora’nın mahalle-i mezbûrede vâki‘ sâkine olduğu bir tarafdan Kapudân kızı demekle ma‘rûfe Kerime nâm hâtun mülkü ve bir tarafdan Aslan ve Avraham nâm Yahudiler mülkleri ve iki tarafdan tarîk-ı hâs ile mahdûd olup ayazmayı müştemil olan büyût-ı müte‘addid[e] bundan akdem hâlik olan babamız Aslan v. ( ) nâm Yahudiden bize bi’l-irsi’ş-şer‘î intikāl ve isâbet eyledi deyû taleb [ve] da‘vâ eylediğimizde mersûme Sarasenyora ben sâlifü’z-zikr büyût-ı müte‘addidi gāibe ani’l-meclis Âişe bt. Hasan nâm hâtundan semen-i ma‘lûm ile iştirâ eyledim mülk-i müşterâmdır deyicek beynimizde münâza‘ât-ı kesîr[e] ve muhâsamât-ı kesîre ve muhâsamât-ı şedîde vâkı‘a olup el-hâletü hâzihî beynimize müslimûn-ı muslihûn tavassut edip bizi yirmi sekiz bin fıddî nakd-i râyic fi’l-vakt akçe üzerine inşâ-i akd-i sulh eylediklerinde biz dahi sulh-i mezbûru kabûl ve bedel-i sulh olan meblağ-ı merkūm yirmi sekiz bin fıddî nakd-i râyic fi’l-vakt akçeyi mersûme Sarasenyora yedinden tamâmen ahz ü kabz eyledik ba‘de’l-yevm hudûd-ı mezkûr ile mahdûd olan büyût-ı müte‘addid ve ayazmaya müte‘allik olan da‘vâdan her birimiz mersûme Sarasenyora’nın zimmetini ibrâ-i âmm-ı kātı‘ü’n-nizâ‘la ibrâ ve iskāt eyledik ba‘de’l-yevm bizden asâleten veya vekîlimizden vekâleten husûs-ı mezkûra müte‘allik da‘vâ dahi sudûr ederse lede’l-hükkâmi’l-kirâm mesmû‘a ve makbûle olmasın dediklerinde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Hurrire fi’l-yevmi’s-sâbi‘ aşer min Zilka‘deti’ş-şerîfe li sene hamsîn ve semânîn ve elf. Şuhûdü’l-hâl: Ahmed Efendi b. İsa, Ahmed Çelebi b. Abdullah, Sefer Beşe b. Musli, Hüseyin Beşe b. Mehmed, Süleyman Çelebi b. Rıdvan, Musa Çelebi b. el-Hâc Hasan, İbrahim Çelebi b. Murad, Ali Çelebi b. Hüseyin, İbrahim Çelebi b. Dilâver ve gayruhüm