Hasköy Mahkemesi 10 Numaralı Sicil (H. 1085 - 1090 / M. 1674 - 1679) cilt: 30, sayfa: 49 Hüküm no: 16 Orijinal metin no: [14-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Elpene bt. Dimitri’nin Rus asıllı câriyesi Raniye bt. Yovar’ı azat ettiği Havâss-ı Aliyye kazâsı müzâfâtından kasaba-i Hasköy mahallâtından Kiremitçi Ahmed Çelebi mahallesinde sâkine Elpene bt. Dimitri nâm Nasrâniye meclis-i şer‘-i hatîr-i lâzımü’t-tevkīrde kendiye rıkkıyyetini mu‘terife olan işbu orta boylu açık kaşlı yüzünde çiçek eseri olup gök elâ gözlü Rûsiyyetü’l-asl Rani[ye] bt. Yovar nâm câriye-i memlûkesi muvâcehesinde bi tav‘ihâ ikrâr ve i‘tirâf edip mevsûf-ı merkūm ile muttasıfe olan mezbûre Raniye’yi hasbeten lillâhi te‘âlâ cemî‘ malımdan âzâd ve i‘tâk ve tahrîr eyledim ba‘de’l-yevm mezbûre Raniye sâir ahrâr-ı asliyyât gibi hürre olup üzerinde hakk-ı velâdan gayrı hakkım bâkī kalmadı dediğinde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Hurrire fi’l-yevmi’s-sâdis ve’l-ışrîn min Zilka‘deti’ş-şerîfe li sene hamsîn ve semânîn ve elf. Şuhûdü’l-hâl: Ekmekçi Mehmed Beşe b. Ahmed, Mehmed Bey b. Abdullah, Ahmed Efendi b. İsa, Musa b. Mustafa, Rali v. Kostantin, Bâli v. Argir, Papas Kostantin v. Şâhî ve gayruhüm