Hasköy Mahkemesi 10 Numaralı Sicil (H. 1085 - 1090 / M. 1674 - 1679) cilt: 30, sayfa: 50 Hüküm no: 17 Orijinal metin no: [14-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sâliha bt. Mehmed’in bahçesinin damadı Hüseyin Beşe b. İbrahim’e satıldığı Havâss-ı Aliyye kazâsı müzâfâtından kasaba-i Hasköy mahallâtından Kiremitçi Ahmed Çelebi mahallesinde sâkine Sâliha bt. Mehmed nâm hâtun tarafından bey‘-i âti’l-beyâ[nı] ikrâra vekîl olup mezbûrenin zâtını ma‘rifet-i şer‘le ârifân olan Ahmed Beşe b. Mehmed ve Dilâver Bey b. Abdullah nâm kimesneler şehâdetleriyle şer‘an vekâleti sâbite olan İbrahim Halîfe b. Murad nâm kimesne meclis-i şer‘-i hatîr-i lâzımü’t-teşrîfde müvekkile-i mezbûrenin dâmâdı râfi‘ü’l-kitâb Hüseyin Beşe b. İbrahim nâm kimesne mahzarında bi’l-vekâle ikrâr ve takrîr-i kelâm edip mahalle-i mezbûrede vâki‘ bir tarafdan Odabaşı Hasan Çelebi veresesi mülkü ve bir tarafdan Mustafa Beşe mülkü ve bir tarafdan müvekkile-i mezbûre mülkü ve bir tarafdan müşterî-i merkūm Hüseyin Beşe mülkü ile mahdûd olup tûlen on sekiz zirâ‘ ve arzen on iki zirâ‘ mülk bahçemi mersûm Hüseyin Beşe’ye tarafeynden îcâbı [ve] kabûlü hâvî bey‘-i kat‘î ile iki [bin] nakd-i râyic fi’l-vakt fıddî akçeye bey‘ ve temlîk edip ol dahi vech-i muharrer üzre iştirâ ve temellük eyledi semeni olan meblağı-ı mersûm iki bin nakd-i râyic fi’l-vakt akçeyi merkūm Hüseyin Beşe yedinden tamâmen ahz ü kabz eyledim ba‘de’l-yevm sâlifü’z-zikr bahçe merkūm Hüseyin Beşe’nin mülk-i müşterâsıdır keyfe mâ yeşâ’ ve yahtâr mutasarrıf olsun dedi dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Hurrire fi’l-yevmi’s-sâdis ve’l-ışrîn min Zilka‘deti’ş-şerîfe li sene hamsîn ve semânîn ve elf. Şuhûdü’l-hâl: Mehmed Bey b. Ali, Ali Bey el-Muhtesib, İbrahim Çelebi b. Dilâver, Şahbaz Bey b. Abdullah, Topçu Mustafa Beşe b. Abdullah