Hasköy Mahkemesi 10 Numaralı Sicil (H. 1085 - 1090 / M. 1674 - 1679) cilt: 30, sayfa: 51 Hüküm no: 18 Orijinal metin no: [15-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yaşuva v. Metatye’nin Rus asıllı Leska bt. Sahon adlı câriyesini sözleşmeyle azat ettiği Havâss-ı Aliyye kazâsı müzâfâtından kasaba-i Hasköy mahallâtından Pîrî Paşa mahallesinde Kirüz cemâ‘atinden Yaşuva v. Metatye nâm Yahudi mahfil-i kazâda kendi için rıkkıyyetini mu‘terife olan işbu uzun boylu açık kaşlı gök elâ gözlü sağ elinin ( ) parmağı eğri Rûsiyyetü’l-asl râfi‘atü’s-sifr Leska bt. Sahon nâm câriye-i memlûkesi muvâcehesinde bi tav‘ihî ikrâr ve i‘tirâf edip evsâf-ı mezbûre ile muttasıfe olan merkūme Leska’yı târih-i kitâbdan sekiz sene tamâmına değin bana istikāmet ile hizmet etmek vechi üzre kitâbete kesip müddet-i madrûbe tamâm oldukdan sonra evsâf-ı mezbûre ile muttasıfe olan merkūme Leska malımdan âz[âd] olup sâir ahrâr-ı asliyyât gibi hürre olsun dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Hurrire fi’l-yevmi’t-tâsi‘ ve’l-ışrîn min Zilka‘deti’ş-şerîfe li sene hamsîn ve semânîn ve elf. Şuhûdü’l-hâl: Ahmed Efendi b. İsa, Mehmed Çavuş b. Abdurrahman, diğer Mehmed Çavuş b. Abdülcebbar, İbrahim Çelebi b. Dilâver, Ali Çelebi el-Muhtesib