Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 112 Hüküm no: 69 Orijinal metin no: [15a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Beşe’nin Rus asıllı cariyesi Lalegül’ün mahkeme kararıyla azat edilmesi İşbu râfi‘atü’l-kitâb uzun boylu açık kaşlı elâ gözlü Rusiyyetü’l-asl Lalegül bt. Abdullah meclis-i şer‘-i şerîf-i enverde mahmiye-i İstanbul’da Kalenderhane mahallesi ahâlîsinden olup kendüye rıkk olmak üzere vaz‘-ı yed eden mevlâsı İbrahim Beşe b. Mehmed muvâcehesinde üzerine da‘vâ ve takrîr-i kelâm edip ben mezbûr İbrahim Beşe’nin câriye-i memlûkesi olup târîh-i kitâbdan bir sene mukaddem cemî‘ malından ihrâç ve i‘tâk ve silk-i harâir-i asliyâta idrâc ve ilhâk etmiş iken mezbûr İbrahim Beşe bana rıkk olmak üzere vaz‘-ı yed eder. Suâl olunup yed-i âdiyesin benden kasr ve izâle olunması matlûbumdur dedikde, gıbbe’s-suâl mezbûr İbrahim Beşe cevâbında evsâf-ı mezbûre ile mevsûfe olan Lalegül nâm câriyeye vaz‘-ı yedin [ikrâr], lâkin târîh-i mezbûrede âzâd eylediğini inkâr edicek müdde‘î-i mezbûreden da‘vâsına mutâbıka beyyine taleb olundukda udûl-ı ricâlden olup mahalle-i mezbûre ahâlîsinden el-Hâc İbrahim Beşe b. Sefer ve Mehmed b. Receb nâm kimesneler li-ecli’ş-şehâde meclis-i şer‘a hâzırûn olup isre’l-istişhâd fi’l-hakīka mezbûr İbrahim Beşe târîh-i kitâbdan bir sene mukaddem bizim huzûrumuzda câriye-i mezbûreyi cemi‘ malından ihrâc ve i‘tâk eyledi, biz bu husûsa şâhidleriz şehâdet dahi ederiz deyü her biri şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri hayyiz-i kabûlde vâkıf[vâkı‘a] oldukdan sonra müdde‘iye-i mezbûrenin ıtkına ba‘de’l-hükm mâ-vaka‘a bi’t-taleb ketb olundu. Fi’l-yevmi’s-sâbi‘ aşer min-Cumâdelâhire li-sene ihdâ ve semânîn ve elf. Şuhûdü’l-hâl: İbrahim Beşe b. Hüseyin el-mübâşir, Ömer b. Abdullah, Mehmed b. Abdullah, Musa b. Hasan