Hasköy Mahkemesi 10 Numaralı Sicil (H. 1085 - 1090 / M. 1674 - 1679) cilt: 30, sayfa: 55 Hüküm no: 25 Orijinal metin no: [20-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mahmud Efendi’nin Abdullah Efendi’den ödünç aldığı ve karşılığında evini ve bahçesini rehin olarak verdiği Husûs-ı âti’l-beyânın mahallinde ketb ü tahrîri iltimâs olunmağın savb-ı şer‘-i enverden mevlânâ Ahmed Efendi irsâl olunup ol dahi Havâss-ı Refî‘a kazâsı müzâfâtından kasaba-i Hasköy’de merhûm ve mağfûr -ed-dâric ilâ mi‘râcı rahmeti rabbihi’l-gafûr- Abdülkādir Efendi hazretlerinin mülkleri olup mahdûm-ı mükerremleri Ahmed Efendi b. Abdullah Efendi’nin ale’l-iştirâki’s-seviy mülkleri olan bahçeye varıp zeyl-i vesîkada muharrerü’l-esâmî müslimîn huzûrlarında akd-i meclis-i şer‘ eyledikde mahmiye-i İstanbul’da Sultan Mehmed Hân câmi‘-i şerîfleri kurbunda sâkin olup Ali Çelebizâde demekle şehîr Mahmud Efendi işbu meclis-i ma‘kūd-ı mezbûrda işbu râfi‘ü’l-kitâb umdetü’l-müderrisîni’l-kirâm müşârün-ileyh Abdullah Efendi mahzarlarında bi’t-tav‘i’s-sâf ikrâr ve i‘tirâf edip müşârün-ileyh Abdullah Efendi kendi mallarından benim yedime idâne ve teslîm edip ben dahi yedlerinden istidâne ve kabz eylediğim üç yüz elli esedî guruş ve semeni târih-i kitâbdan iki yüz kırk gün tamâmına değin müeccel ve mev‘ûd bir kitâb-ı Fetâvâ-yı Hidâye bahâsından otuz beş esedî guruş dahi ki cem‘an müşârün-ileyh hazretlerine zimmetimde lâzımü’l-edâ ve vâcibü’l-kazâ üç yüz seksen beş esedî guruş deynim oldukdan sonra zikr olunan Hasköy kasabasında vâki‘ iki tarafından müşârün-ileyhimâ Ahmed Efendi ve Abdullah Efendi hazretlerinin mülk menzil ve bahçeleri ve bir tarafdan merhûm Musa Paşa veresesi yedlerinde olup hâlâ Hasan Ağa nâm kimesnenin mülkü olan bahçe ve bir tarafdan tarîk-ı âm ile mahdûd olup arsasının senede merhûm Sultan Bayezid Hân vakfı’na altı yüz akçe mukāta‘ası olup ve kadîmü’l-eyyâmdan çayır olup hâlâ ben hafr-i bi’r ve gars-ı eşcâr eylediğim işbu mülk bahçeyi ve bi’r-i mezkûru vakf-ı mezbûr mütevellîsi ma‘rifetiyle ve mârrü’z-zikr bahçe hudûdunda vâki‘ benim binâ ve ihdâs eylediğim fevkānî ve tahtânî altı bâb odaları ve iki sofayı ve havluyu müştemil işbu mülk menzilimi dahi ba‘de’t-tahliyyeti’ş-şer‘iyye ve’t-tekābuzi’l-mer‘î mûmâ-ileyh Abdullah Efendi’ye meblağayn-ı mezbûreyn üç yüz seksen beş esedî guruş mukābelesinde rehin vaz‘ ve teslîm eyledim anlar dahi vech-i muharrer üzre irtihân ve tesellüm ve kabûl eylediler dedikde gıbbe’t-tasdîki’ş-şer‘î yine mezbûr Mahmud Efendi müşârün-ileyh Abdullah Efendi hazretleri muvâcehelerinde i‘âde-i kelâm edip eğer ecel-i mezbûr hulûlünde meblağayn-ı mezbûreyn üç yüz seksen beş esedî guruşu müşârün-ileyh hazretlerine edâ ve teslîm etmez isem mârrü’z-zikr bahçeyi vakf-ı mezbûr mütevellîsi ma‘rifetiyle ve semen-i misli ile âhara bey‘a ve menzil-i mezbûru dahi kezâlik semen-i misli ile âhara bey‘a ve semeneyn-i mezkûreynden meblağayn-ı mezbûreyn üç yüz seksen beş esedî guruşu ahz ve istîfâya ve fazla kalırsa bana îsâle ve noksan gelirse bana îsâle ve noksan gelirse yine ben tekmîl etmek üzre mûmâ-ileyh Abdullah Efendi hazretlerini küllemâ azeltüke fe-ente vekîli üzre azl ve in‘izâlden masûne vekâlet-i devriyye ile tarafımdan vekîl ve nâib-i menâb nasb ve ta‘yîn eyledim dedikde anlar dahi vekâlet-i mezbûreyi kabûl ve hıdemât-ı lâzımesini kemâ yenbağī edâya ta‘ahhüd eylediklerinden sonra vâki‘ü’l-hâli mevlânâ-yı mezbûr mahallinde ketb ü tahrîri ma‘an ba‘s olunan muhzır Ahmed ile mahfil-i şer‘a gelip alâ vukū‘ihi inhâ ve takrîr etmeğin mâ vaka‘a bi’t-taleb ketb olundu. Fi’l-yevmi’l-hâdî ve’l-ışrîn min Şevvâli’l-mükerrem li sene hamsîn ve semânîn ve elf. Şuhûdü’l-hâl: Umdetü’l-müderrisîn Süleyman Efendi, umdetü’l-müderrisîn Hüseyin Efendi, Fahrü’l-eimme Şaban Efendi, Fahrü’l-akrân İbrahim Ağa Kethüdâ, İbrahim Beşe b. Abdullah, Mehmed Beşe b. Abdurrahim, Ömer Çelebi b. Abdülvedûd, Mehmed Beşe b. ( ) el-bağban ve gayruhüm mine’l-huzzâr