Hasköy Mahkemesi 10 Numaralı Sicil (H. 1085 - 1090 / M. 1674 - 1679) cilt: 30, sayfa: 57 Hüküm no: 26 Orijinal metin no: [20-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Halil b. Mahmud’un evini kardeşi Mehmed’e sattığı ve bedelini hibe ettiği Havâss-ı Aliyye kazâsı müzâfâtından kasaba-i Hasköy mahallâtından Pîrî Paşa mahallesinde sâkin Halil b. Mahmud meclis-i şer‘-i hatîr-i lâzımü’t-tevkīrde li-ebeveyn er karındaşı işbu hâmil-i hâze’l-kitâb Mehmed mahzarında bi tav‘ihâ ikrâr ve takrîr-i kelâm edip akd-i âti’z-zikrin sudûruna değin silk-i mülk-i sahîhimde münselik olan emlâkimden mahalle-i mezbûrede vâki‘ bir tarafdan Kerime Hâtun mülkü ve bir tarafdan kendi mülküm ve bir tarafdan Mehmed Efendi mülkü ve bir tarafdan tarîk-ı hâssa müntehî kendi tarafımda olan duvar müşterek olmak vechi üzre müştemil mülk menzilimi cümle tevâbi‘ ve levâhıkıyla ve âmme-i menâfi‘ ve merâfıkı ile karındaşım mezbûr Mehmed’e yüz aded esedî guruşa tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm ol dahi minvâl-i muharrer üzre iştirâ ve tesellüm [21] ettikden sonra semeni olan meblağ-ı mersûm yüz esedî guruşu mezbûr Mehmed yedinden bi’t-tamâm ve’l-kemâl ahz ü kabz edip yine semen-i mersûm yüz esedî guruşu mezkûr Mehmed’e hibe-i sahîha-i şer‘iyye ile hibe ve temlîk ve teslîm eyleyip ol dahi meclis-i hibede ittihâb ve kabz ve tesellüm eyledi ba‘de’l-yevm menzil-i mahdûd mezkûr Mehmed’in mülk-i mevhûbudur keyfe mâ yeşâ’ ve hasbe mâ yürîd mutasarrıf olsun dedikde mukırr-ı mezbûr Halil’in minvâl-i muharrer üzre cârî ve sâdır olan ikrâr ve takrîrini el-mukarru lehü’l-mezbûr Mehmed bi’l-muvâcehe tasdîk edicek mâ hüve’l-vâki‘ gıbbe’l-ibtigā ketb ü imlâ olundu. Hurrire fi’l-yevmi’s-sâbi‘ min Muharremi’l-harâm li sene sitte ve semânîn ve elf. Şuhûdü’l-hâl: es-Seyyid Ahmed Efendi b. es-Seyyid Hasan, es-Seyyid Şükrullah Çelebi b. es-Seyyid Hüseyin, Mehmed Efendi b. Mustafa el-İmâm, Abdülbâkī Efendi b. Ahmed, Abdullah Çelebi b. Mehmed, karındaşı Ahmed Çelebi b. Mehmed, Ahmed b. el-Hâc Osman, Ahmed Bey b. Musa, Hüseyin Beşe b. İbrahim, İbrahim Bey, Mehmed Beşe [b.] Hüseyin ve gayruhüm mine’l-hâzırîn