Hasköy Mahkemesi 10 Numaralı Sicil (H. 1085 - 1090 / M. 1674 - 1679) cilt: 30, sayfa: 57 Hüküm no: 27 Orijinal metin no: [21-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Subaşı Musa Bey’in Yako’yu kayık içinde alınıp satılması yasak olan içki ile yakaladığı, Yako’nun içkiyi Hasköy’de satmak için getirdiğini ikrarı Havâss-ı Aliyye kazâsına tâbi‘ kasaba-i Hasköy’de bi’l-fi‘l subaşı olan râfi‘ü’l-kitâb Musa Bey b. Mehmed nâm kimesne meclis-i şer‘-i şerîfe Mahrûse-i Galata müzâfâtından Kuruçeşme nâm karye sâkinlerinden olup Ağlona cemâ‘atinden olan Yako v. Bazerle nâm Yahudiyi ihzâr ve muvâcehesinde üzerine takrîr-i da‘vâ edip merkūm Yako’yu işbu târih-i kitâb günü kasaba-i mezbûre iskelesi kurbunda bir kayık içinde bey‘ ve şirâsı memnû‘ olan dört aded tulum hamr ile ahz eyledim suâl olunup takrîr [ve] tahrîr ve mûceb-i şer‘îsi icrâ olunmak matlûbumdur dedikde gıbbe’s-suâl mersûm Yako cevâbında fi’l-vâki‘ işbu târih-i kitâb günü minvâl-i muharrer üzre zikr olunan dört aded tulum hamr ile kayık içinde beni mezbûr subaşı Musa Bey ahz eylediği mukarrerdir lâkin ol tulumları kasaba-i merkūmede bey‘ için getirmişimdir deyû tav‘an ikrâr etmeğin mûcebiyle ba‘de’l-hükm mâ vaka‘a bi’t-taleb ketb olundu. Fi’l-yevmi’s-sâbi‘ min Muharremi’l-harâm li sene sitte ve semânîn ve elf. Şuhûdü’l-hâl: Süleyman Çelebi b. Ramazan, Hızır Bey b. Abdullah, İbrahim b. Dilâver, Mahmud b. Mehmed ve gayruhüm mine’l-hâzırîn