Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 112 Hüküm no: 70 Orijinal metin no: [15a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kazancı esnafı para vakfı mütevelliliğine İbrahim b. Musa’nın tayin olunması Hüccet, hasbî mütevellî Kazgancı tâifesinden ba‘zı kimesnelerin gallesi mahmiye-i İstanbul’da olan tâife-i mezbûrenin orduları ve müflisen vefât edenlerinin techîz ve tekfîni ve fukarâsından olup sıla-i rahm murâd edenlerin harcırâhları mühimmâtı için mevkūfe olan sekiz yüz yetmiş yedi buçuk riyâlî guruşun mütevellîsi olan Hâfız Ali Çelebi nâm kimesne vefât edip tevliyet-i mezbûre mahlûle ve tâife-i mezbûreden işbu sâhibü’l-kitâb el-Hâc İbrahim b. Musa nâm kimesne salih ve dindâr ve mütedeyyin ve perhizkâr olup tevliyet-i mezbûre uhdesinden gelmeğe kādir olduğu tâife-i mezkûrenin kethüdâları Ramazan bt. Mehmed ve yiğitbaşıları Mahmud b. Murtaza ve ihtiyârlarından el-Hâc Osman b. Sefer ve el-Hâc Ahmed b. Abdulkadir ve Mehmed Beşe b. Ömer nâm kimesneler ihbârlarıyla müte‘ayyin oldukdan sonra hâkim-i muvakkı‘-ı sadr-ı kitâb tûbâ lehû ve hüsnü-meâb hazretleri dahi mezbûr el-Hâc İbrahim vazîfe-i mu‘ayyenesiyle vakf-ı mezbûra mütevellî nasb u ta‘yîn eyledikde ol dahi tevliyet-i mezbûreyi kabûl ve merâsimini kemâ-yenbağī edâya ta‘ahhüd etmeğin mâ-vaka‘a bi’t-taleb ketb olundu. Fi’l-yevmi’r-râbi‘ ve’l-ışrîn min-Cumâdelûlâ li-sene ihdâ ve semânîn ve elf. Şuhûdü’l-hâl: Üstâd Mehmed b. Abdulkadir, Mustafa Çelebi b. Musa, ve Ali Bey b. Mehmed Ağa ve İbrahim Çelebi b. ( ).