Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 113 Hüküm no: 71 Orijinal metin no: [15a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yakob v. Haçador’a olan borcunu ödemesi hususunda Safar’a tenbihte bulunulması Tüccâr tâifesinden işbu bâ‘isü’s-sifr Yakob v. Haçador nâm zimmî meclis-i şer‘de Safar v. Melkon nâm zimmî muvâcehesinde üzerine da‘vâ ve takrîr-i kelâm edip mezbûr Safar’a târîh-i kitâbdan beş sene mukaddem on bir bin beş yüz akçe ikrâz ve teslîm, ol dahi iktirâz ve kabz ve tesellüm eyledikden sonra meblağ-ı mezbûrdan beş yüz yetmiş beş akçesini nakid ve bin yüz elli akçeye dört zirâ‘ benefşe iskarlet çuka [15b] ve bin akçeye üç top beyâz kenarlı Üskübü bezi ve bin sekiz yüz akçeye yirmi vukıye kahve ki cem‘an dört bin beş yüz akçe olmak üzere bana def‘ ü teslîm edip bâkī zimmetinde altı bin dokuz yüz yetmiş beş akçe hakkım kalmışdır. Hâlâ mezbûrdan taleb ederim suâl olunsun dedikde, gıbbe’s-suâl mezbûr Safar cevâbında fi’l-hakīka târîh-i mezbûrda müdde‘î-i mezbûr bana on bir bin beşyüz akçe ikrâz ve teslîm edip ben dahi iktirâz ve kabz ve tesellüm eylediğimden sonra meblağ-ı mezbûrdan beş yüz yetmiş beş akçesini nakid ve bin yüzelli akçeye dört zirâ‘ benefşe iskarlet çuka ve bin akçeye üç top beyâz kenarlı Üskübü bezi ve bin sekiz yüz akçeye yirmi vakiye kahve ki cem‘an dört bin beş yüz akçeye olmak üzere kendüye def‘ ve teslîm edip bâkī altı bin dokuz yüz yetmiş beş akçe müdde‘î-i mezbûra zimmetimde vâcibü’l-edâ ve lâzımü’l-kazâ deynim vardır deyü bi-tav‘ihî ikrâr u i‘tirâf etmeğin mûcebince meblağ-ı bâkī altı bin dokuz yüz yetmiş beş akçeyi müdde‘î-i mezbûr Yakub’a edâ ve teslîme mezbûr Safar’a tenbîh birle mâ-hüve’l-vâki‘ bi’t-taleb ketb olundu. Fi’l-yevmi’l-hâdî aşer min-Cumâdelâhire li-sene ihdâ ve semânîn ve elf. Şuhûdü’l-hâl: Mustafa Çelebi b. el-Hâc Ahmed, İbrahim Çelebi b. Ahmed, Şükrullah Bey b. Mustafa, Abdullah Çelebi b. Hüseyin, Veli b. Mahmud.