Hasköy Mahkemesi 10 Numaralı Sicil (H. 1085 - 1090 / M. 1674 - 1679) cilt: 30, sayfa: 67 Hüküm no: 42 Orijinal metin no: [28-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İlya v. Polihroni’nin evini Abraham v. Polihron’a sattığı Havâss-ı Refî‘a kazâsı müzâfâtından Hasköy’de Pîrî Paşa mahallesinde sâkin Yahudi tâifesinden İlya v. Polihroni nâm Yahudi meclis-i şer‘de işbu sâhibü’l-kitâb Abraham v. Polihron nâm Yahudi muvâcehesinde ikrâr-ı tâm ve takrîr-i kelâm edip işbu âti’z-zikrin sudûruna değin silk-i mülkümde münselik ve muntazam olup mahalle-i merkūmede vâki‘ bir tarafdan Mosi ve Hayim ve Samiropola mülkleri ve bir tarafdan Dursi nâm Yahudi mülkü ve bir tarafdan tarîk-ı hâs ve bir tarafdan tarîk-i âm ile mahdûd bir bâb tahtânî odayı ve pazarcı dükkânını ve bahçeyi ve tûlen yirmi iki zirâ‘ ve arzen dokuz buçuk zirâ‘ arsayı müştemil olan mülk menzilimi merkūm Abraham’a yüz iki esedî guruşa bey‘ edip kabz-ı semen-i ma‘dûd ve teslîm-i mebî‘-i mahdûd eyledim ba‘de’l-yevm menzil-i mezbûr mezbûr Abraham’ın mülk-i müşterâsıdır keyfe mâ yeşâ’ ve yahtâr mutasarrıf olsun dedikde gıbbe’t-tasdîk mâ vaka‘a bi’t-taleb ketb olundu. Hurrire fî 7 min Cumâdelûlâ li sene sitte ve semânîn ve elf. Şuhûdü’l-hâl: Abdülbâkī Efendi b. Ahmed, İbrahim Efendi b. Mustafa, el-Hâc İbrahim b. Mehmed, Hüseyin el-Hallâc?, Ömer Çelebi el-Attâr, Abraham v. Behar, Arzed v. Yasef, Karinos v. Haron