Hasköy Mahkemesi 10 Numaralı Sicil (H. 1085 - 1090 / M. 1674 - 1679) cilt: 30, sayfa: 67 Hüküm no: 43 Orijinal metin no: [29-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yani v. Nikola’nın evini Hristodoli v. Nikola’ya sattığı Vilâyet-i Rumeli’nde Gördös kazâsına tâbi‘ Tırhala nâm karyede sâkin Yani v. Pavlo nâm zimmî meclis-i şer‘-i hatîr-i lâzımü’t-tevkīrde işbu sâhibü’l-kitâb Hristodoli v. Nikola nâm zimmî muvâcehesinde ikrâr-ı tâm ve takrîr-i kelâm edip akd-i âti’z-zikrin sudûruna değin silk-i mülkümde münselik ve münharıt olup Havâss-ı Refî‘a kazâsı müzâfâtından kasaba-i Hasköy’de Kiremitçi Ahmed Çelebi mahallesinde vâki‘ bir tarafdan izzetlü ve sa‘âdetlü hâlâ yeniçeri ağası olan Kara Hasanzâde Ağa hazretlerinin taht-ı tasarrufunda olan menzil ve bir tarafdan Yorgaki v. Nikola nâm zimmî mülkü ve iki tarafdan tarîk-ı âm ile mahdûd tabaka-i selâseyi hâvî olup tabaka-i ulvîsinde bir bâb şehnişînli odayı ve bir matbah odasını ve bir kileri ve kenîfi ve tabaka-i vustâsında bir bâb odayı ve bir matbah odasını ve kenîfi ve tabaka-i süflîsinde bir mahzeni müştemil olan mülk menzilimi kâffe-i hukūkuyla merkūm Hristodoli’ye üç yüz elli esedî guruşa ve mechûlü’l-aded bir kabza fülûsa bey‘-i bâtt-ı sahîh-i şer‘î ile bey‘ ve teslîm edip ol dahi iştirâ ve tesellüm ettikden sonra semeni olan meblağ-ı mezkûr üç yüz elli esedî guruşu yedinden tamâmen ahz ü kabz edip ve mezkûr bir kabza fülûsu dahi hîn-i akidde tazyî‘ eyledim ba‘de’l-yevm zikr olunan menzil cemî‘ müştemilâtıyla merkūm Hristodoli’nin mülk-i müşterâsı ve hakk-ı sırfıdır keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î işbu hâzırûn bi’l-meclis İspolyot v. Yorgi ve Yani v. Tebro ve Feraşet v. Bahtik nâm zimmîler menzil-i merkūm ve semen-i merkūm üç yüz elli guruşa her biri emr ve kabûlü hâvî kefâlet-i sahîha-i şer‘iyye ile kefîl olduk dediklerinde mâ hüve’l-vâki‘ bi’t-taleb ketb olundu. Fi’l-yevmi’l-hâmis min Cumâdelûlâ li sene sitte ve semânîn ve elf. Şuhûdü’l-hâl: Abdülbâkī Efendi b. Ahmed Efendi, Hüseyin Efendi b. Muharrem, Yusuf Ağa b. Hasan, Mehmed Bey b. Ali, İbrahim Beşe b. Abdünnebi, Mehmed Çelebi b. Abdülkādir, Süleyman Çelebi b. Ramazan, Mehmed Bey b. Hüseyin, Receb Beşe b. Nasuh, Sefer Bey b. Abdullah, Abdi b. Mustafa, Ali Çelebi b. Abdullah, Kurd v. Angeli, Anaşaş v. Yorgi, Polihron v. Papa Yani, Yani v. Yorgi, İspolyot v. Dimitri, Yani v. Nikola, Rali v. Kostantin, Simavon v. Fehrezâd, Papa Kostantin v. Şahin, Papa Yani v. Atanaş, Andon[aki] v. Manolaki, Dimaki v. Yani, Kostantin v. Behar ve gayruhüm mine’l-huzzâr