Hasköy Mahkemesi 10 Numaralı Sicil (H. 1085 - 1090 / M. 1674 - 1679) cilt: 30, sayfa: 76 Hüküm no: 62 Orijinal metin no: [38-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kiremitçi Ahmed Çelebi Vakfı’na ait arsanın kiracısı Haydarşah’ın kiremit işlemek için arsaya verdiği zararı tazmin edeceği Budur ki Havâss-ı Aliyye kazâsına tâbi‘ kasaba-i Hasköy’de vâki‘ mersûm Kiremitçi Ahmed Çelebi binâ eylediği câmi‘-i şerîfin meşrûtiyyet üzre mütevellîsi olan İmâm Mehmed Efendi b. Mustafa nâm kimesne meclis-i şer‘-i hatîr-i lâzımü’t-tevkīrde bâ‘isü’s-sifr Haydarşah v. Ragazer nâm Ermeni muvâcehesinde bi’t-tevliyye ikrâr ve takrîr-i kelâm edip vakf-ı mezbûreden olup kasaba-i mezbûrede vâki‘ lede’l-ahâlî ve’l-cîrân ma‘lûmü’l-hudûd bir kiremitçi kârhânesinde icâre-i mu‘accele ve müeccele-i ma‘lûmeteyn [ile] merkūm Haydarşah’ın taht-ı icâresinde olmağın kârhâne-i mezkûrenin herbârı? içinde mevcûd olan vakf-ı mezbûrun toprağını kazıp kendi mesârifine sarf etmekle arsa-i mezbûra noksan-ı semen îrâs edip ben dahi tevliyyetim hasebiyle arsa-i mezbûrenin noksanı olan sekiz yüz elli akçeyi ba‘de’t-tahmîn mezbûr Haydarşah yedinden vakf-ı mezbûr için bi’t-tamâm ve’l-kemâl ahz ü kabz eylediğimden sonra mezbûr Haydarşah dahi vakf-ı mezbûr cânibinden izn-i mütevellî olmadıkça arsa-i mezbûreyi kazmamak üzre ta‘ahhüd edip ve zikri mürûr eden noksan-ı arsa-i mezbûreye müte‘allik mezbûr Haydarşah ile da‘vâm ve nizâ‘ım yokdur dedikde mukırr-ı mezbûr Mehmed Efendi’nin cârî ve sâdır olan ikrârını merkūm Haydarşah vicâhen tasdîk ve şifâhen tahkīk etmeğin mâ hüve’l-vâki‘ bi’t-taleb ketb olundu. Fi’l-yevmi’s-sâdis aşer min Cumâdelâhire li sene seb‘în ve semânîn ve elf. Şuhûdü’l-hâl: Mehmed b. Ali el-Muhtesib, Mustafa Beşe b. Abdullah Çelebi, İbrahim b. Dilâver el-Muhzır, Mustafa Beşe b. Süleyman, Mustafa Çelebi b. Abdullah, Dilâver Bey b. Abdullah Bevv[â]b-ı? sultânî ve gayruhüm mine’l-huzzâr