Hasköy Mahkemesi 10 Numaralı Sicil (H. 1085 - 1090 / M. 1674 - 1679) cilt: 30, sayfa: 76 Hüküm no: 63 Orijinal metin no: [38-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İsmail b. Hasan’ın kendisini yaralayan Ezbode v. Yeragob ile davasında sulh oldukları Budur ki Havâss-ı Aliyye kazâsına tâbi‘ kasaba-i [Hasköy] mahallâtından Abdüsselâm mahallesinde sâkin İsmail b. Hasan nâm kimesne tarafından sulh [ve] ibrâya vekîli olup Mehmed Çelebi b. Hüseyin Çelebi ve Hüseyin Çelebi b. Mustafa nâm kimesne[lerin] şehâdetleriyle şer‘an vekâleti sâbite olan İbrahim Çelebi b. Dilâver meclis-i şer‘-i şerîfde işbu râfi‘ü’s-sifr Ezbode v. Yeragob nâm zimmî muvâcehesinde bi’l-vekâle ikrâr ve takrîr-i kelâm edip târih-i kitâbdan on beş günden mukaddem müvekkilim mezbûr İsmail kendi hâlinde mahalle-i mezbû[re] sûk[un]da gider iken mezbûra muşta çekip sağ buduna dokunup mecrûh etmekle müvekkilim mezbûr da‘vâ ve taleb edi[cek] cerh-i mezbûrdan [39] da‘vâsından yüz seksen akçe üzerine inşâ-i akd-i sulh ettiklerinde el-hâletü hâzihî muslihûn tavassut edip cerh-i mezbûr da‘vâsından yüz seksen akçe üzre inşâ-i [akd-i sulh ettiklerinde] müvekkilim mezbûr İsmail dahi sulh-i mezbûru kabûl ve bedel-i sulh olan meblağ-ı mezbûru merkūm üzerine yedinden ahz ü kabz ettikden sonra mâ yahdüsü minhüden mezbûr Ezbode’nin zimmetini ibrâ-i âmm-ı kātı‘ü’n-nizâ‘ ile [i]skāt eyledi dedi dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâlis aşer min Cumâdelâhire li sene seb‘în ve semânîn ve elf. Şuhûdü’l-hâl: Ahmed Efendi b. Mustafa el-İmâm, Dilâver Bey b. Abdullah Bevvâb-ı sultânî, Mehmed Bey [b.] Ali el-Muhtesib?, Ali b. Abdurrahman ve gayruhüm mine’l-huzzâr