Hasköy Mahkemesi 10 Numaralı Sicil (H. 1085 - 1090 / M. 1674 - 1679) cilt: 30, sayfa: 77 Hüküm no: 64 Orijinal metin no: [39-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âişe bt. Behram Bey’in Safiye Kadın’a olan borcunun bir kısmının ödendiği, kalanının otuz gün içinde ödeneceği Mahmiye-i İstanbul’da Molla Şerif mahallesinde sâkine Âişe bt. Behram Bey nâm hâtun tarafından ikrâra vekîl olup vekâleti bimâ hüve nehcü’s-sübût şer‘an sâbite olan Halil Çelebi b. Abdullah meclis-i şer‘-i şerîfde fahrü’l-muhaddarât tâcü’l-mestûrât bâ‘isetü hâze’l-kitâb Safiye Kadın taraf[ın]dan ikrâr-ı âti’l-beyânı tasdîke vekîl olup [vekâleti] ber nehc-i şer‘iyye sâbite olan Receb Beşe b. Mehmed mahzarında bi’l-vekâle ikrâr ve takrîr-i kelâm edip müvekkile-i mezbûrenin müvekkile-i mûmâ-ileyhâya cihet-i karz-ı şer‘îden yedi yüz esedî guruş deyni olup meblağ-ı mezbûrdan üç yüz esedî guruş müvekkile-i mûmâ-ileyhâya def‘ ve teslîm ol dahi ahz ü kabz ettiğinden sonra meblağ-ı mezbûra işbu hâzırân bi’l-meclis olan Ahmed Çelebi b. Mehmed ve İbrahim Çelebi b. Kenan ve Mehmed Bey b. Ali [ve] vekîl-i mezbûr Halil Çelebi dahi târih-i kitâbdan otuz gün tamâmına değin müeccel ve bâkī dört yüz esedî guruşu her birimiz emr ve kabûlü hâvî kefâlet-i sahîha-i şer‘iyye ile kefîl ve zâmin olduk dediklerinde vekîl-i mezbûr Receb Beşe mukırrûn[-u mezbûrûnu vicâhen tasdîk ve] şifâhen tahkīk etmeğin mâ hüve’l-vâki‘ bi’t-taleb ketb olundu. Fi’l-yevm[i’l-]hâmis aşer min Cemâziyelâhir li sene seb‘în ve semânîn ve elf. Şuhûdü’l-hâl: Kefîl? Mehmed Efendi b. Abdullah, diğer kefîl? Mehmed Efendi el-İmâm, fahrü’l-kuzât Hasan Efendi