Hasköy Mahkemesi 10 Numaralı Sicil (H. 1085 - 1090 / M. 1674 - 1679) cilt: 30, sayfa: 78 Hüküm no: 65 Orijinal metin no: [40-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kemal v. Salamon’un nalçacı gediğini Mustafa b. Hasan’a devrettiği Havâss-ı Aliyye kazâsına tâbi‘ kasaba-i Hasköy mahallâtından Kiremitçi Ahmed Çelebi mahallesinde sâkin Kemal v. Salamon nâm Yahudi meclis-i şer‘-i hatîr-i lâzımü’t-tevkīrde işbu râfi‘ü’l-kitâb Mustafa b. Hasan nâm kimesne mahzarında ikrâr ve takrîr-i kelâm edip kasaba-i mezbûre çarşısında vâki‘ bir kepenk nalçacı gediğini mezbûr Mustafa’ya dört bin akçe bedel mukābelesinde ferâğ edip ol dahi kabûl ve tesellüm eylediğinden sonra bedel-i mezbûru merkūm Mustafa yedinden tamâmen ahz ü kabz eyledim min ba‘d zikr olunan bir kepenk nalçacı gediğinde alâka ve medhalim yokdur mezbûr Mustafa’nın hakkı olmuşdur dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Gurre-i Recebi’l-mürecceb li sene seb‘în ve semânîn ve elf min hicreti men lehü’l-izzü ve’ş-şeref. Şuhûdü’l-hâl: Dilâver Bey b. Abdullah, Mehmed Halîfe b. Abdülkādir el-Müezzin, Şaban b. Hasan, Ahmed Çelebi b. İsmail, Mehmed Çelebi b. Hasan, Mustafa Beşe b. Abdullah, Mehmed Bey b. Ali el-Muhtesib, Mehmed b. İvaz, Mehmed Bey b. Abdullah, Ali Çelebi b. Abd[ül]aziz Tercümân, Mustafa b. Süleyman, Hasan b. Hüseyin, Mustafa Çelebi [b.] Abdullah ve gayruhüm mine’l-huzzâr