Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 114 Hüküm no: 73 Orijinal metin no: [15b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şaban Bey’in Halil Bey aleyhindeki alacak iddiasından men olunması Hüccet, gasb da‘vâsı Fi’l-asl vilâyet-i Anadolu’da İnegöl kasabası ahâlîsinden olup hâlâ mahmiye-i İstanbul’da Samatya kapısı kurbünde Hüseyin Ağa mahallesinde misâferet tarîkıyle sâkin Şa‘bân Bey b. Cuma nâm kimesne meclis-i şer‘-i şerîfde bâ‘isü’l-kitâb Halil Bey b. Hüseyin nâm kimesne mahzarında üzerine da‘vâ ve takrîr-i kelâm edip mezbûr Halil Bey bundan akdem kasaba-i mezbûre voyvodası iken beni bi-gayr-ı hakkın hapsedip kırk kıt‘a esedî guruşumu ahz u kabz etmişdir, suâl olunup meblağ-ı mezbûr kırk kıt‘a esedî guruşun mezbûr Halil Bey’den alıverilmesi matlûbumdur dedikde gıbbe’s-suâl ve’l-inkâr müdde‘î-i mezbûrdan müdde‘âsını mübeyyin beyyine taleb olundukda ityân-ı beyyineden izhâr-ı acz ile istihlâf etmeğin fi’l-vâki‘ müdde‘î-i mezbûrun kasaba-i mezbûrede bi-gayr-ı hakkın kırk kıt‘a [16a] esedî guruşu ahz u kabz etmeyip el-ân üzerine edâsı lâzım deyni olmadığına mezbûr Halil Bey’e yemîn teklîf olundukda ol dahi alâ-vefki’l-mesûl yemîn billâhi’l-aliyyi’l-a‘lâ etmeğin mûcebince müdde‘î-i mezbûr bilâ-beyyine mu‘ârazadan men‘ olunup mâ-vaka‘a bi’t-taleb ketb olundu. Fi’l-yevmi’r-râbi‘ aşer min-Cumâdelâhire li-sene ihdâ ve semânîn ve elf. Şuhûdü’l-hâl: İbrahim Çelebi b. Ahmed, Mustafa Çelebi b. el-Hâc Ahmed, Abdi Çelebi b. Hüseyin, Veli b. Mahmud.