Hasköy Mahkemesi 10 Numaralı Sicil (H. 1085 - 1090 / M. 1674 - 1679) cilt: 30, sayfa: 85 Hüküm no: 80 Orijinal metin no: [48-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âişe bt. Abdullah’ın evini Safiye Kadın bt. Necib Efendi’ye sattığı İzzetlü Bostancıbaşı Ağa hazretleri ma‘rifet-i şer‘le tefahhus edeler deyû buyruldu. Husûs-ı âti’l-beyânın mahallinde tahrîri için bi’t-taleb mahkeme-i şerîfeden mevlânâ Mustafa Efendi irsâl olunup ol dahi zeyl-i kitâbda muharrerü’l-esâmî olan müslimîn ile kasaba-i Hasköy’de Sütlüce’de vâki‘ Mahmud Efendi mahallesinde sâkin olup sâbıkan Anadolu kazaskeri olan a‘lemü’l-ulemâ’i’l-izâm ve efdalü’l-fuzalâ’i’l-fihâm izzetlü Mustafa Efendi’nin sa‘âdethânelerine varılıp akd-i meclis-i şer‘ olundukda medîne-i Hazret-i Ebâ Eyyûb el-Ensârî’de Değirmenbaşı? mahallesi sâkinelerinden olup Şaban Bey b. Musa ve Mustafa Çelebi b. Şaban ta‘rîfleriyle mu‘arrefe olan Âişe bt. Abdullah meclis-i ma‘kūd-ı mezkûrda umdetü’l-muhaddarât Safiye Kadın bt. el-Hâc el-merhûm ed-dâric ilâ medârici rahmeti Rabbihi’l-gafûr Necib Efendi hazretleri taraf-ı şerîflerinden ikrâr-ı âti’l-beyânı tasdîke vekîl olup nehc-i şer‘î üzre vekâleti sâbite olan Muhyiddin Mehmed Efendi b. eş-Şeyh Mehmed mahzarında ikrâr ve i‘tirâf edip akd-i âti’z-zikrin sudûruna değin silk-i mülk-i sahîhimde münselik olup arsasının kasaba-i mezbûrede vâki‘ Pîrî Paşa vakfı’na senede altmış akçe mukāta‘ası ve binâsı mülküm olan mahalle-i mezbûrede vâki‘ bir tarafı Yusuf Efendi [b.] Sinan ve bir tarafı mûmâ-ileyhânın mülkü ve bir tarafı Rahime Hanım veresesi mülkleri ve bir tarafı tarîk-ı âm ile mahdûd tabaka-i ulyâda iki bâb oda ve bir kiler ve bir sofa vustâda bir bâb oda ve bir sofa ve bir matbah ve iki kenîf ve altında ahır ve bi’r-i mâ’ ve eşcâr-ı müsmire ve gayrı müsmire bahçeyi müştemil ve köşkü mülk menzilimi cümle tevâbi‘ ve levâhıkı ile müvekkil-i mûmâ-ileyhâ Safiye Kadın’a altı yüz esedî guruşa tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm ol dahi minvâl-i muharrer üzre iştirâ ve tesellüm ve kabz ve kabûl eyledikden sonra semeni olan meblağ-ı mezbûr altı yüz esedî guruşu yedinden bi’t-tamâm ahz ü kabz eyledim ba‘de’l-yevm menzil-i mahdûd-ı mezkûrda vechen mine’l-vücûh alâka ve medhalim yokdur müvekkile-i mûmâ-ileyhâ Safiye Kadın’ın mülk-i müşterâsı olmuşdur keyfe mâ yeşâ’ mutasarrıfe olsun dedikde gıbbe’t-tasdîk vâki‘ hâli mevlânâ-yı mezkûr mahallinde tahrîr ba‘dehû gelip haber vermeğin mâ vaka‘a kayd şüd. Fî 3 Safer sene [10]89. Şuhûdü’l-hâl: Abdülhalim Efendi [b.] Abdurrahman, Molla Mustafa [b.] Osman ..?, ..? b. Hacı Mustafa, Derviş Tüccâr?, Ömer? Efendi