Hasköy Mahkemesi 10 Numaralı Sicil (H. 1085 - 1090 / M. 1674 - 1679) cilt: 30, sayfa: 86 Hüküm no: 81 Orijinal metin no: [49-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Halife’nin Hasköy’ün sürsat malından teslim edilmemiş borcu kaldığı Havâss-ı Aliyye kazâsına tâbi‘ kasaba-i Hasköy’de vâki‘ merhûm Kiremitçi Ahmed Çelebi binâ eylediği câmi‘-i şerîfde müezzin olan Mehmed Halîfe b. Abdülkādir nâm kimesne meclis-i şer‘de debbağ tâifesinden bâ‘isü’l-kitâb Mehmed Çelebi b. Siyavuş mahzarında bi’t-tav‘ ve’r-rızâ ikrâr ve i‘tirâf edip işbu sene-i mübârekede kasaba-i Hasköy re‘âyâsına ve ehl-i sûkuna taraf-ı saltanat-ı aliyyeden bâ-fermân-ı âlî nâzil olan sürsat malından iki yüz seksen iki esedî guruş ahz ü kabz eylediğimden sonra meblağ-ı mezbûrdan iki yüz elli yedi guruşu sürsat emîni olan kimesneye teslîme der-uhde eden Hasan Çelebi’ye teslîm edip zimmetimde yirmi beş esedî guruş lâzımü’l-edâ ve vâcibü’l-kazâ deynimdir ve berberler tâifesinden cem‘ eylediğim akçeden dahi zimmetimde dört esedî guruş ki cem‘an yirmi dokuz esedî guruş mezbûr Mehmed Çelebi’ye deynimdir deyû bi’t-tav‘ ikrâr ve i‘tirâf etmeğin alâ mûceb-i i‘tirâfihî meblağ-ı mezbûr yirmi dokuz esedî guruşu mezbûr Mehmed Çelebi’ye edâ ve teslîme mezbûr müezzin Mehmed Halîfe’ye tenbîh birle mâ vaka‘a kayd şüd. Fî 27 min Muharrem sene [10]89. Şuhûdü’l-hâl: Fahrü’l-müderrisîni’l-kirâm İshak Efendi el-Eyyûbî, Abbas Çelebi b. birâder-i müezzin, Süleyman Çelebi b. Mustafa, İbrahim [b.] Dilâver, Ali Muhzır, Ahmed Çavuş b. Ali tersâne ( ) ve gayruhüm