Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 115 Hüküm no: 75 Orijinal metin no: [16a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Hasan b. Mustafa’nın menzilini Kadı Mustafa Efendi’ye satması
Efendi hazretlerinin mülknâmesidir
Mahmiye-i İstanbul’da Debbâğ Yunus mahallesi ahâlîsinden el-Hâc Hasan b. Mustafa tarafından husûs-ı âti’l-beyâna vekîl olup vekâleti es-Seyyid Mehmed Efendi b. es-Seyyid Mehmed Efendi ve Muhâsebe Kâtibi Mehmed Efendi b. Mahmud şehâdetleriyle şer‘an zâhir ve sâbite olan Hasan Beşe b. Abdullah nâm kimesne meclis-i şer‘-i şerîf-i enverde hâlâ mahmiye-i mezbûrede hâkimü’ş-şer‘i’ş-şerîf olan a‘lemü’l-ulemâi’l-izâm efdalü’l-fudalâi’l-fihâm yenbû‘ü’l-fezâil ve’l-me‘âlî metbû‘ü’l-efâzıl ve’l-e‘âlî hallâlü’l-müşkilâti’d-dîniyye, keşşâfü’l-mufaddalâti’l-yakīniye a‘lemü’l-ilm ve’l-hüdâ menârü’l-fazl ve’t-tukâ fazîletli Mustafa Efendi hazretlerinin kethüdâları taraf-ı bâhirü’ş-şereflerinden tasdîk-i âti’z-zikre vekîl olup vekâleti bimâ-hüve tarîku’s-sübût şer‘an sâbite olan işbu râfi‘ü’l-kitâb umdetü’l-eşbâh Derviş Ağa b. Mehmed muvâcehesinde bi’l-vekâle ikrâr ve takrîr-i kelâm edip müvekkilim mezbûrun silk-i mülkünde münselik olup mahalle-i mezbûrede vâki‘ bir tarafdan ba‘zan Emrullah Kapudan ve ba‘zan Dülger Hasan ve bir tarafdan Çavuşzâde Ömer Ağa nâm kimesneler mülkleri ve bir tarafdan ba‘zan el-Hâc Mehmed Çelebi ve ba‘zan el-Hâc Ali nâm kimesneler menzilleri ve bir tarafdan tarîk-i âm ile mahdûd olup bir bab tahtânî oda ve bir sofa ve bir kenîf ve cüneyneyi müştemil mülk menzilini cemî‘ tevâbi‘ ve levâhıkı ve âmme-i hukūk ve merâfıkı ile tarafeynden îcâb ve kabûlü hâvî bey‘-i bâtt ile otuz bir bin akçeye bey‘ ve teslîm edip ol dahi iştirâ ve tesellüm ve kabûl eyledikden sonra semen-i mezbûr otuz bir bin akçeyi vekîl-i mezbûr Derviş Ağa yedinden tamâmen ahz u kabz edip ba‘de’l-yevm menzil-i mahdûd-ı mezbûr müvekkil-i müşârün-ileyh Mustafa Efendi Hazretlerinin mülk-i müşterâsıdır, keyfe mâ yeşâ ve yahtâr mutasarrıf olunsun dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu.
Fi’l-yevmi’s-sâbi‘ aşer min-Cumâdelâhir li-sene ihdâ ve semânîn ve elf.
Şuhûdü’l-hâl: Fahrü’l-eimme Abdurrahman Efendi b. Ömer, el-Hâc Veli Ağa b. Eyüb, Ramazan Efendi b. Ali, el-Hâc Mustafa b. Ahmed, Mehmed Ağa b. Abdullah, Ömer Çavuş b. Ahmed, Hasan b. Ali, Ali Çelebi b. Ramazan, Kasım Efendi b. Ali, Yusuf b. Oruç.
|