Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 116 Hüküm no: 76 Orijinal metin no: [16a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mahkeme kararı ile eski eşi Handan Bey’e dönmesine karar verilen Hatice Hatun’un muhâlaa yoluyla boşanması Fi’l-asl vilâyet-i Rumili’nde medîne-i Sofya mahallâtından Vildânzâde mahallesi sâkinelerinden olup hâlâ mahmiye-i İstanbul’da Bayezid Ağa mahallesi sâkinelerinden Hadîce bt. Piyale nâm hatun meclis-i şer‘-i şerîfde sâlifü’z-zikr Vildânzâde mahallesi ahâlîsinden olan bâ‘isü’l-kitâb Handan Bey b. Abdullah nâm kimesne mahzarında ikrâr ve takrîr-i kelâm edip medîne-i mezbûrede altı bin akçe mehr-i müeccel ile nefsimi mezbûr Handan Bey’e inkâh ve tezvîc mezbûr Handan Bey dahi ba‘de’t-tezevvüc ve’d-duhûl Macar seferinde küffâr-ı hâksâra esîr olduğundan sonra mezbûr Handan Bey vefât edip deyü birkaç nefer kimesneler bana haber vermekle ben dahi nefsimi sâbıkā Medîne-i münevvereden ma‘zûl olan İvaz Efendi’nin Filibe Kādısı iken kethüdâsı olan Ahmed Ağa’ya inkâh ve tezvîc edip ol dahi ba‘de’t-tezevvüc ve’d-duhûl beni mahmiye-i mezbûreye getirip ba‘dehû fevt oldukda ba‘de inkızâi’l-idde nefsimi hâzır bi’l-meclis Odabaşı Mustafa Beşe b. Hüseyin’e tezvîc ve inkâh edip ol dahi tezevvüc ve duhûl etdikden sonra mezbûr Handan Bey vech-i muharrer üzere zevcesi olduğumu mezbûr Odabaşı Mustafa Beşe muvâcehesinde hâkim-i muvakkı‘-ı sadr-ı kitâb huzûrunda [16b] da‘vâ ve müdde‘âsını şuhûd-ı udûl ile isbât edip mezbûr Odabaşı Mustafa Beşe’den tefrîka hükm-i şer‘î lâhık olduğundan sonra mezbûr Handan Bey zimmetinde mütekarrir ve ma‘kūdün-aleyh olan altı bin akçe mehr-i müeccelim ve yedimden ahz u kabz etdiği otuz guruş ve nafaka-i iddet-i ma‘lûmem üzerlerine ve yedimde mülküm olup sâlifü’z-zikr Vildanzâde mahallesinde vâki‘ iki tarafdan İshak Efendi mülkü ve bir tarafdan Şahızaman mûrisesi mülkleri ve bir tarafdan tarîk-i âm ile mahdûd dâhiliye iki bâb tahtânî oda ve bi’r-i mâ ve havlu müştemil menzilim mezbûr Handan Bey’in mülkü olup me’ûnet-i süknâm dahi kendi üzerime olmak üzere mezbûr Handan Bey ile muhâla‘a-i sahîha-i şer‘iyye ile muhâla‘a edip ol dahi hul‘-ı mezbûru kabûl edip menzil-i mahdûd-ı mezbûru mahallinde kabza tarafımdan mezbûr Handan Bey’i taslît etdiğimden sonra zevciyete müte‘allıka da‘vâdan her birimiz âharın zimmetini ibrâ ve iskāt eyledik dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’r-râbi‘ aşer min-Cumâdelâhire li-sene ihdâ ve semânîn ve elf. Şuhûdü’l-hâl: Mustafa Beşe b. Süleyman, Abdi Beşe b. Rasûl, Ömer Beşe b. Mustafa, Abdi Beşe b. Mehmed, İbrahim Beşe b. Ser-oda, Mehmed Beşe ser-oda.