Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 117 Hüküm no: 77 Orijinal metin no: [16b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bali b. Ramazan’ın varisi Râbia’nın Âmine Hatun’da olan alacağı tahsil etmesi Hüccet, husûsa müte‘allıkadan ibrâ Mahrûse-i Galata muzâfâtından kasaba-i Beşiktaş’da Yenimahalle ahâlîsinden iken bundan akdem vefât eden Bali b. Ramazan’ın sulbiye kızı ve hasren vârisesi Râbia nâm hatun meclis-i şer‘-i şerîfde mahrûse-i mezbûreye tâbi‘ kasaba-i Tophane’de Çukurcuma mahallesi sâkinelerinden iken bundan akdem vefât eden Âmine bt. el-Hâc Hızır nâm hatunun veresesinden tereke-i vâfiyesine vâzı‘u’l-yed olan zevci bâ‘isü hâze’l-kitâb el-Hâc Abdülvahab nâm kimesne mahzarında takrîr-i kelâm edip babam müteveffâ-yı mezbûrun deyn-i şer‘îden müteveffât-ı mezbûre Âmine zimmetinde yüz yirmi riyâlî guruş hakkı olduğunu bundan akdem hâkimü’ş-şer‘ huzûrunda mezbûr el-Hâc Mehmed’den da‘vâ ve müdde‘âmı muvâcehesinde şuhûd-ı udûl ile isbât edip ba‘de’t-tahlîfi’ş-şer‘î meblağ-ı mezbûru müteveffât-ı mezbûrenin tereke-i vâfiyesinden bana edâya merkūm el-Hâc Mehmed’e tenbîh olundukdan sonra mezbûr Hacı Mehmed meblağ-ı mezbûr yüz yirmi riyâlî guruş için bana râyic fi’l-vakt on üç bin cedîd akçe verip ben dahi kabûl ve kabz etdiğimden sonra husûs-ı mezbûra müte‘allıka da‘vâdan mezbûr Hacı Mehmed’in zimmetini ibrâ-i âm ile ibrâ ve iskāt eyledim dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’s-sâlis aşer min-Cemâziyelâhire li-sene ihdâ ve semânîn ve elf. Şuhûdü’l-hâl: Mehmed Beşe b. Süleyman, Mehmed Çelebi b. Sefer, Hüseyin Beşe b. Mehmed, Halil Beşe b. Musli.