Hasköy Mahkemesi 10 Numaralı Sicil (H. 1085 - 1090 / M. 1674 - 1679) cilt: 30, sayfa: 96 Hüküm no: 99 Orijinal metin no: [58-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Harap durumdaki vakıf evin tamiri için bahçesinden bir kısmının ayrılıp Ahmed Çelebi b. Mehmed Efendi’ye icâreteynle kiralandığı Havâss-ı Aliyye kazâsına tâbi‘ kasaba-i Hasköy mahallâtından Abdüsselâm Bey mahallesinde vâki‘ merhûm Abdullah Hâmidî nâm sâhibü’l-hayrın evvelâ zevcesi Ferahnâz Hâtun’a ve evlâdına ve evlâd-ı evlâd-ı evlâdına ve ba‘de’l-inkırâz utekāsına ve evlâd-ı evlâd-ı utekāsına ve ba‘de’l-inkırâz zikr olunan Abdüsselâm Mescid-i şerîfinin imâmına süknâ olmak üzre vakf eylediği menzilin bi’l-fi‘l mütevellîsi olan Ahmed Efendi b. Mustafa nâm kimesne meclis-i şer‘-i hatîr-i lâzımü’t-tevkīrde işbu râfi‘ü’l-kitâb Ahmed Çelebi b. Mehmed Efendi mahzarında bi’t-tevliyye ikrâr-ı tâm ve takrîr-i kelâm edip mahalle-i mezbûrede vâki‘ şark cânibi Emine Hâtun vakfı olan menzil ve kıble cânibi Pirinççibaşı Mehmed Ağa kızı mülkü ve bir tarafı ba‘zan mezârlık ve ba‘zan mescid-i mezbûr ve bir tarafı tarîk-ı âm ile mahdûd ve bir bâb beyt-i süflî ve bi’r-i mâyı ve eşcâr-ı müsmireyi hâvî bahçeyi havluyu müştemil olan vakıf menzil harâba müşrif olup kābil-i süknâ olmayıp meremmâta muhtâc olmağla vakfın dahi meremmâta müsâ‘adesi olmamağla şark cânibinden tûlen yedi buçuk zirâ‘ ve arzen on beş zirâ‘ [bi-] hesâb-ı satrancî yüz on iki buçuk zirâ‘ yeri bahçesinden ifrâz olunup menzil-i mezbûrun meremmâtı için îcâr olunmak lâzım olmağın târih-i kitâbdan sekiz kıt‘a esedî guruş icâre-i mu‘accele ve beher ayda beşer akçe icâre-i müeccele ile mezbûr Ahmed Çelebi’ye tevliyyetim hasebiyle îcâr edip ol dahi minvâl-i muharrer üzre istîcâr ve kabûl eyledikden sonra zikr olunan sekiz kıt‘a esedî guruş mu‘accel[ey]i mezbûr Ahmed Çelebi yedinden bi’t-tamâm vakıf için ahz ü kabz eyledim ba‘de’l-yevm mezbûr Ahmed Çelebi mâh be-mâh ücret-i merkūmeyi cânib-i vakfa edâ eyleye zikr olunan arsayı zabt ve tasarruf edip kimesne dahl ve ta‘arruz etmeye dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Tahrîren fî 10 şehri Rebî‘ilâhir sene 1089. Şuhûdü’l-hâl: Mustafa Çelebi b. Dilâver, Mustafa Beşe b. Ali, İsmail Çelebi b. Mehmed, Hüseyin Çelebi b. Ali, Hasan Çelebi b. Ali, Mehmed Çelebi b. Hüseyin, Musa Bey b. Arslan, Mehmed Çelebi b. Hasan, İbrahim Çelebi b. Dilâver, İbrahim Çelebi b. Ali, Ali Çelebi b. Abdurrahman, Dilâver Bey Bevvâb-ı sultânî