Hasköy Mahkemesi 10 Numaralı Sicil (H. 1085 - 1090 / M. 1674 - 1679) cilt: 30, sayfa: 97 Hüküm no: 100 Orijinal metin no: [58-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali Efendi b. Hacı Mehmed’in evini Mehmed b. Abdullah’a sattığı Havâss-ı Aliyye kazâsına tâbi‘ kasaba-i Hasköy mahallâtından Turşucu mahallesi imâmı Ali Efendi b. El-Hâc Mehmed nâm kimesne meclis-i şer‘-i hatîr-i lâzımü’t-tevkīrde işbu râfi‘ü’l-kitâb Mehmed b. Abdullah nâm kimesne mahzarında ikrâr-ı tâm ve takrîr-i kelâm edip el-Hâc Şaban mahallesinde vâki‘ bir tarafı Havva Hâtun mülkü ve bir tarafı Hüseyin Çelebi mülkü ve bir tarafı Berber Hasan veresesi mülkleri ve taraf-ı râbi‘i tarîk-ı hâs ile mahdûd bir bâb fevkānî odayı ve sofayı ve altında ahırı ve bi’r-i mâyı ve eşcâr-ı müsmireyi müştemil havluyu ve Hüseyin Çelebi ile müşterek kenîfi müştemil mülk menzilimi bi cümleti’t-tevâbi‘ ve’l-levâhık mezbûr Mehmed’e doksan kıt‘a esedî guruşa bey‘-i bâtt-ı sahîh-i şer‘î ile bey‘ ve teslîm edip ol dahi minvâl-i muharrer üzre iştirâ ve kabz ve kabûl eyledikden sonra semeni olan meblağ-ı mezbûr doksan kıt‘a esedî guruşu mezbûr Mehmed yedinden bi’t-tamâm ahz ü kabz eyledim ba‘de’l-yevm menzil-i mahdûd-ı mezkûr merkūm Mehmed’in mülk-i müşterâsıdır keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Tahrîren fî 14 şehri Rebî‘ilâhir li sene 1089. Şuhûdü’l-hâl: Abdülbâkī Efendi b. Ahmed Efendi el-İmâm, Mehmed Ağa b. Ali bahçe ustası, Ebûbekir Çelebi b. Hasan el-Müezzin, Mehmed Bey b. Ahmed, Ahmed Beşe b. Abdurrahman, Ahmed b. Mustafa, Ahmed b. Mehmed, Hüseyin Çelebi b. Ahmed Bey, kömürcü Mehmed, Ahmed b. Hasan, Mehmed b. Hasan, Ali Çelebi b. Abdurrahman, İbrahim Çelebi b. Dilâver