Hasköy Mahkemesi 10 Numaralı Sicil (H. 1085 - 1090 / M. 1674 - 1679) cilt: 30, sayfa: 98 Hüküm no: 103 Orijinal metin no: [59-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İlya v. Menahem’in vakıfdan ödünç aldığı paranın kefili olan kardeşi Mihayil’den tahsil edilmesi Medîne-i Hazret-i Ebâ Eyyûb el-Ensârî mahallâtından Câmi‘-i Kebîr mahallesi sükkânından olup medîne-i mezbûrede vâki‘ merhûm Fütûha Hâtun vakfı’na bi’l-fi‘l mütevellî olan işbu bâ‘isü’l-kitâb Mehmed Çavuş b. Abdullah nâm kimesne Havâss-ı Aliyye kazâsına tâbi‘ Hasköy nâm kasaba mahallâtından Kiremitçi Ahmed Çelebi mahallesi sükkânından Mihayil v. Menahem nâm Yahudiyi meclis-i şer‘a ihzâr ve mahzarında takrîr-i da‘vâ edip mezbûr Mihayil Yahudinin karındaşı olup gāib ani’l-meclis olan İlya v. Menahem ve Mihayil Yahudinin târih-i kitâbdan bir sene mukaddem vakf-ı mezbûr malından alâ tarîki’l-karz yedimden ahz ü kabz eylediği doksan altı buçuk esedî guruşa karındaşı mezbûr Mihayil kefîl bi’l-mâl olmuşdur kefâletine binâ[en] taleb ederim alıverilmesi matlûbumdur dedikde gıbbe’s-suâl mezbûr Mihayil cevâbında fi’l-hakīka gāib ani’l-meclis olan karındaşım mezbûr İlya Yahudinin târih-i kitâbdan bir sene mukaddem vakf-ı mezbûr malından olmak üzre mütevellî-i mezbûr Mehmed Çavuş yedinden alâ tarîki’l-karz ahz ü kabz eylediği mezbûr doksan altı buçuk guruşa tarafeynden emr ve kabûlü hâviye kefâlet-i sahîha-i şer‘iyye ile kefîl bi’l-mâl oldum idi deyû bi’t-tav‘i’s-sâf mu‘terif olmağın mûcebiyle edâsına tenbîh birle işbu vesîka alâ mâ hüve’l-hakīka mütevellî-i mezbûr talebiyle ketb olundu. Tahrîren fi’l-yevmi’t-tâsi‘ ve’l-ışrîn min Rebî‘ilâhir li sene tis‘în ve semânîn ve elf. Şuhûdü’l-hâl: Ahmed b. Hasan, Dilâver Bey b. Abdullah, Mehmed b. İbrahim Çavuş, Ali b. Abdullah, Mustafa b. Mehmed, İbrahim b. Dilâver