Hasköy Mahkemesi 10 Numaralı Sicil (H. 1085 - 1090 / M. 1674 - 1679) cilt: 30, sayfa: 99 Hüküm no: 104 Orijinal metin no: [60-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kosta v. Yorgi’nin kölesi Andriye’nin denizde boğularak öldüğünün cesedinin keşfinden anlaşıldığı Havâss-ı Aliyye kazâsına tâbi‘ Hasköy nâm kasaba mahallâtından Pîrî Paşa mahallesi imâmı İbrahim Efendi b. Murad ve mahalle-i merkūme ahâlîsinden Mehmed Çelebi b. Siyavuş ve Mustafa b. Dilâver ve Abdurrahman b. Mehmed ve sâirler meclis-i şer‘de hâzırûn olup her biri takrîr-i kelâm edip işbu meclis-i şer‘de hâzır olup kasaba-i merkūme mahallâtından Abdüsselâm mahallesi sükkânından Kosta v. Yorgi nâm zimmînin abd-i memlûkü Andriye nâm kâfir târih-i kitâbdan beş gün mukaddem gāib olmuş idi el-hâletü hâzihî târih-i kitâb günü zikr olunan Pîrî Paşa mahallesi kurbunda deryâ kenarında garîkan helâk olmuş bulunup ba‘dehû keşf ve tahrîr için kasaba-i merkūme mahallâtından Kiremitçi Ahmed Çelebi mahallesi kurbunda Hasan Çelebi b. Mustafa nâm kimesnenin kiremithânesi harmanına nakl olunmuşdur üzerine varılıp keşf ve tahrîr olunmak taleb ederiz dediklerinde bu fakīr hâlâ hâssa bostancılar başısı olan izzetlü ve sa‘âdetlü Mustafa Ağa hazretleri taraf-ı şerîflerinden hâlâ fahrü’l-akrân Haseki el-Hâc Hüseyin Bey ve kasaba-i mezbûre subaşısı el-Hâc Ömer Bey ve kolluk çorbacısı Hüseyin Ağa ve zeyl-i kitâbdan mastûrü’l-esâmî olan müslimîn ile garîk-i merkūmun üzerine varılıp nazar olundukda deryâda birkaç gün meksden nâşî çehresine kan oturup sâir âzâsında aslâ eser-i cerâhat olmadığı müşâhede olunup mahallinde vukū‘u üzre tahrîr olundukdan sonra garîk-i mezbûrun mâliki olan mezbûr Kosta ol mahalde takrîr-i kelâm edip fi’l-hakīka abd-i memlûküm garîk-i mezbûr târih-i kitâbdan beş gün mukaddem gāib olmuş idi târih-i kitâb günü zikr olunan mahalde bi emrillâhi te‘âlâ garîkan helâk olmuş bulunmuşdu ahâlî-i mahalle ile ve sâir bir ferdiyle dem ve diyete müte‘allika da‘vâ ve nizâ‘ım yokdur dedikde mâ cerâ alâ vukū‘ihi bi’t-taleb ketb olundu. Tahrîren fi’l-yevmi’t-tâsi‘ ve’l-ışrîn min Rebî‘ilâhir li sene tis‘în ve semânîn ve elf. Şuhûdü’l-hâl: Hüseyin Çelebi b. Mehmed, Mustafa b. Abdullah, Mehmed Bey b. Ali, Abdurrahman Çelebi b. Mehmed, Mehmed Çelebi b. Siyavuş, Hüseyin b. Mehmed, Mustafa Çelebi b. Dilâver, Pîrî Paşa imâmı İbrahim Efendi b. Murad, Ali Çelebi b. Hasan, Mehmed Çelebi b. Ahmed, Mustafa Beşe, Hasan Çelebi b. Mustafa, Ömer Beşe b. Ahmed