Hasköy Mahkemesi 10 Numaralı Sicil (H. 1085 - 1090 / M. 1674 - 1679) cilt: 30, sayfa: 100 Hüküm no: 105 Orijinal metin no: [60-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ohan v. Menas’ın Bağdasar v. Serkis’e ödünç verdiği paranın ödenmesi talebi Vilâyeti Anadolu’da vâki‘ Harput nâm kasaba müzâfâtından Kibrit nâm karye sükkânından olup hâlâ mahmiye-i İstanbul’da Turşucular odasında müsâferet vechi üzre sâkin olan Ermeni tâifesinden işbu bâ‘isü’s-sifr Ohan v. Menas nâm papaz yine Ermeni tâifesinden Bağdasar v. Serkis nâm Nasrânîyi meclis-i şer‘a ihzâr ve mahzarında takrîr-i da‘vâ edip bundan akdem bin seksen sekiz Ramazân-ı şerîfinin on beşinci günü mahmiye-i mezbûrede vâki‘ arabacılar odaları ta‘bîr olunur handa mezbûr Bağdasar benden alâ tarîki’l-karz elli iki esedî guruş ahz ü kabz edip meblağ-ı mezbûr el-ân [61] zimmetinde bana lâzımü’l-edâ deyndir suâl olunup hakkım alıverilmek matlûbumdur dedikde gıbbe’s-suâl ve akībe’l-inkâr müdde‘î-i mezbûrdan da‘vâsına mutâbık beyyine taleb olundukda udûl-i müslimînden olup mahmiye-i mezbûr mahallâtından Aksaray mahallesi sükkânından Ahmed b. Mehmed nâm kimesne ile Kumkapısı’nda sâkin Ermeni tâifesinden İsak v. Serkis meclis-i şer‘a hâzırân olup istişhâd olunduklarında fi’l-hakīka bundan akdem bin seksen sekiz Ramazân-ı şerîfi’nin on beşinci günü zikr olunan arabacılar odaları ta‘bîr olunur handa müdde‘î-i mezbûr Ohan mezbûr Bağda[sar]’a alâ tarîki’l-karz elli iki esedî guruş verip merkūm Bağdasar dahi meblağ-ı mezbûr elli iki esedî guruşu müdde‘î-i mezbûrun yedinden bizim huzûrumuzda ahz ü kabz edip mezbûr Bağdasar’ın zimmetinde müdde‘î-i mezbûr Ohan papazın vech-i muharrer üzre elli iki esedî guruş hakkı vardır biz bu husûsa bu vech üzre şâhidleriz şehâdet dahi ederiz deyû her biri edâ-yı şehâdet-i şer‘iyye eylediklerinde gıbbe ri‘âyeti şerâiti’l-kabûl şehâdetleri hayyiz-i kabûlde vâkı‘a oldukdan sonra meblağ-ı mezbûr elli iki esedî guruşu müdde‘î-i mezbûr Ohan papaza edâ ve teslîme mezbûr Bağdasar’a tenbîh birle mâ vaka‘a bi’t-taleb ketb olundu. Tahrîren fi’l-yevmi’s-sâlis aşer min Cumâdelûlâ li sene tis‘în ve semânîn ve elf. Şuhûdü’l-hâl: Fahrü’l-kuzât Abdülkādir Efendi b. İbrahim Efendi, Hüseyin Beşe b. Ahmed, Mehmed Beşe b. Hüseyin, Mehmed Çelebi b. İbrahim, İbrahim b. Dilâver, Mustafa b. Mehmed, Abdülkādir Beşe b. Süleyman, Ali Beşe b. Dilâver ve gayruhüm