Hasköy Mahkemesi 10 Numaralı Sicil (H. 1085 - 1090 / M. 1674 - 1679) cilt: 30, sayfa: 103 Hüküm no: 109 Orijinal metin no: [63-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hatice Hâtun bt. Yusuf Ağa’nın evinin Kalos v. Kurdbâli adlı Ermeniye satıldığı Husûs-ı âti’l-beyânın mahallinde tahrîr-i iltimâs olunmağın bu fakīr zeyl-i kitâbda mastûrü’l-esâmî olan müslimîn ile mahmiye-i İstanbul’da Molla Fenârî mahallesi sâkinelerinden fahrü’l-muhaddarât Hatice Hâtun bt. el-merhûm Yusuf Ağa b. Abdülmennân’ın Havâss-ı Aliyye kazâsına tâbi‘ kasaba-i Hasköy mahallâtından Abdüsselâm mahallesinde vâki‘ menziline varılıp akd-i meclis-i şer‘ olundukda mezbûr Hatice Hâtun’un zâtını ma‘rifet-i şer‘iyye ile ârifân olan mezbûr Abdüsselâm mahallesi imâmı Ahmed Efendi b. Mustafa ve kasaba-i mezbûrede vâki‘ Turşucu câmi‘i imâmı Ali Efendi b. El-Hâc Mehmed nâm kimesneler ta‘rîfleriyle mu‘arrefe oldukdan sonra müşârün-ileyhâ Hatice Hâtun meclis-i ma‘kūd-ı mezkûrda işbu bâ‘isü’s-sifr kiremitçi tâifesinden Kalos v. Kurdbâli nâm Ermeni muvâcehesinde bi’t-tav‘i’s-sâf ikrâr ve i‘tirâf edip akd-i âti’z-zikr sudûruna değin silk-i mülk-i sahîhimde münselik olan emlâkimden olup zikri mürûr eden Abdüsselâm mahallesinde vâki‘ bir tarafdan yine kendi mülküm ve bir tarafdan Fehrad oğlu Agop nâm Ermeni mülkü ve iki tarafdan tarîk-ı âm ile mahdûd ve iki bâb fevkānî ve iki bâb tahtânî odaları ve tahta-pûşu ve sofayı ve müstakil sokak kapısını ve kenîfi ve tûlen on yedi zirâ‘ ve arzen altı zirâ‘ ve ber hesâb-ı satrancî yüz iki zirâ‘ arz-ı hâliyeyi müştemil mülk menzilimi bi cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık mezbûr Kalos’a beş yüz on iki esedî guruşa tarafeynden îcâb ve kabûlü hâvî bey‘-i bâtt-ı sahîh-i şer‘iyle bey‘ edip meclis-i ma‘kūd-ı mezkûrda semeni olan sâlifü’z-zikr beş yüz on iki esedî guruşu mezbûr Kalos yedinden bi’t-tamâm ahz ü kabz edip teslîm-i mebî‘ kıldım fîmâ ba‘d menzil-i mârrü’z-zikr merkūm Kalos Ermeni’nin müşterâsıdır keyfe mâ yeşâ’ mutasarrıf olsun dedikde mukırra-i mezbûre Hatice Hâtun’un vech-i muharrer üzre cârî olan ikrârını müşterî-i merkūm Kalos Ermeni dahi bi’l-muvâcehe tasdîk edicek mâ vaka‘a bi’t-taleb ketb olundu. Tahrîren fi’l-yevmi’s-sâbi‘ aşer min Cumâdelûlâ sene tis‘în ve semânîn ve elf. Şuhûdü’l-hâl: Ali Efendi b. El-Hâc Mehmed, Mehmed Çavuş b. İbrahim, Mehmed Efendi b. Mustafa, Mustafa Çelebi b. Dilâver, Mehmed Bey b. Ali, Mehmed Çelebi b. Hasan, Ahmed Çelebi b. Mehmed Efendi, Hüseyin Çelebi b. Mustafa, Mehmed Çelebi b. Ahmed, Mustafa Beşe b. Ali, Hüseyin Ağa b. Ramazan, Ali Çelebi b. Abdullah, Mehmed Ağa b. İbrahim, Mehmed Beşe b. Hüseyin, El-Hâc Mustafa b. Abdullah, Ramazan b. Musa, Mehmed b. Siyavuş, El-Hâc Mehmed b. İbrahim, İbrahim Çelebi b. Dilâver, Dilâver Bey b. Abdullah, Ramazan b. Abdullah, Mustafa Hâce b. Mehmed