Hasköy Mahkemesi 10 Numaralı Sicil (H. 1085 - 1090 / M. 1674 - 1679) cilt: 30, sayfa: 104 Hüküm no: 110 Orijinal metin no: [64-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Saltane bt. Dimitri ile zevcesi Yorgaki v. Nikola’nın muhâlaa ile boşandıkları Mahmiye-i İstanbul mahallâtından Abdi Subaşı mahallesi sâkinelerinden Saltane bt. Dimitri v. Manolaki nâm Nasrâniye meclis-i şer‘-i hatîr-i lâzımü’t-tevkīrde zevc-i muhâlı‘ı olan işbu bâ‘isü’s-sifr Yorgaki v. Nikola nâm zimmî muvâcehesinde bi’t-tav‘ ve’r-rızâ ikrâr ve i‘tirâf edip zevcim mezbûr Yorgaki ile beynimizde şikāk vâki‘ olup hul‘ murâd edinmeğin zimmetinde olan yirmi bin akçe mehr-i müeccelimden ve cihet-i karzdan zimmetinde lâzımü’l-edâ bana deyni olan otuz esedî guruşdan ve sâir zevciyyete müte‘allika de‘âvî ve husûmât ve mütâlebâtdan ferâğ üzre muhâla‘a eyleyip min ba‘d ol benden ve ben andan kat‘-ı alâka ve terk-i nizâ‘ edip her birimiz âharın zimmetini ibrâ-i âmm-ı kātı‘ü’n-nizâ‘ ile ibrâ ve iskāt eyledik dedikde mukırra-i mezbûre Saltane Nasrâniye Yani v. Ergiri ve Dimitri v. Polihron nâm zimmîler ta‘rîfleriyle mu‘arrefe oldukdan sonra mezbûr Yorgaki zimmî dahi vech-i meşrûh üzre hul‘ ettim deyû vicâhen tasdîk edicek mâ hüve’l-vâki‘ bi’t-taleb ketb olundu. Tahrîren fi’l-yevmi’s-sâlis ve’l-ışrîn min Cumâdelûlâ li sene tis‘în ve semânîn ve elf. Şuhûdü’l-hâl: Receb Beşe b. Nasuh, Mehmed Beşe b. Hüseyin, Sinan Beşe b. Hasan, Abbas Beşe b. Mustafa, İbrahim b. Dilâver el-Muhzır, Ali b. Abdurrahman el-Muhzır, Mustafa Halîfe b. Mehmed, Mehmed Çelebi b. İbrahim el-Muhtesib, Yani v. Ergiri, Dimitri v. Polihron ve gayruhüm mine’l-huzzâr