Hasköy Mahkemesi 10 Numaralı Sicil (H. 1085 - 1090 / M. 1674 - 1679) cilt: 30, sayfa: 116 Hüküm no: 130 Orijinal metin no: [74-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mercan v. Ferahzâd’ın kendisinden haksız yere para alındığı iddiasıyla açtığı davanın reddi Havâss-ı Aliyye kazâsına tâbi‘ kasaba-i Hasköy ahâlîsinden olup mavnacı tâifesinden olan Mercan v. Ferahzâd nâm Ermeni meclis-i şer‘-i hatîr-i lâzımü’t-tevkīrde işbu râfi‘ü’l-kitâb Hasan b. Ali nâm kimesne mahzarında üzerine da‘vâ ve takrîr-i kelâm edip târih-i kitâbdan yedi sene mukaddem mezbûr Hasan benden bi gayrı vech-i şer‘î on dokuz buçuk esedî guruşumu ahz ü kabz etmeğin hâlâ meblağ-ı mezbûru taleb ederim suâl olunup alıverilmesi matlûbumdur dedikde gıbbe’s-suâl mezbûr Hasan cevâbında târih-i mezbûrda kasaba-i mezbûrede nâibü’ş-şer‘ olan Abdülhalim Efendi huzûrunda taleb ve da‘vâyı mezbûr Mercan münkir olup benden müdde‘âmı mübeyyine beyyine taleb olundukda ben dahi mezbûr Mercan Ermeni’nin bana cihet-i karz-ı mezbûreden on dokuz buçuk esedî guruş deyni olduğunu Agop ve Haçador nâm Ermeniler şehâdetleri ile muvâcehesinde isbât edip mûmâ-ileyh Abdülhalim Efendi şâhidlerimizi tezkiyyeden sonra şehâdetlerini kabûl edip meblağ-ı mezbûr on [75] dokuz buçuk esedî guruşu bana hükm edip ben dahi ol vechile mezbûr Mercan yedinden ahz ü kabz eyledim dedikde gıbbe’s-suâl mezbûr Mercan kaziyye vech-i muharrer üzre olduğunu münkir olıcak mezbûr Hasan’dan takrîrine muvâfıka beyyine taleb olundukda udûl-i müslimînden olup kasaba-i mezbûr mahallâtından el-Hâc Şaban mahallesi sükkânından Abdülbâkī Efendi b. Ahmed ve kasaba-i mezbûre sükkânından Abdüsselâm mahallesi[nden] İbrahim b. Dilâver nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-vâki‘ târih-i kitâbdan yedi sene mukaddem kasaba-i mezbûrede nâibü’ş-şer‘ olan Abdülhalim Efendi huzûruna mezbûr Hasan merkūm Mercan’ı ihzâr ve muvâcehesinde zimmetinde cihet-i karz-ı şer‘îden on dokuz buçuk esedî guruş hakkım vardır deyû da‘vâ ve taleb eylediğimde mezbûr Mercan münkir olup mezbûr Hasan’dan nâibü’ş-şer‘ mûmâ-ileyh müdde‘âsını mübeyyine beyyine taleb eyledikde mezbûrân Agop ve Haçador nâm Ermeniler li ecli’ş-şehâde meclis-i şer‘a hâzırân olup istişhâd olunduklarında her biri fi’l-hakīka müdde‘î-i mezbûr Hasan’ın merkūm Mercan zimmetinde cihet-i karz-ı şer‘îden on dokuz buçuk esedî guruş hakkı vardır biz bu husûsa bu vech üzre şâhidleriz şehâdet dahi ederiz deyû her biri edâ-yı şehâdet-i şer‘iyye eylediklerinden sonra mûmâ-ileyh Abdülhalim Efendi dahi ba‘de’t-tezkiyye mezbûrân Agop ve Haçador nâm Ermenilerin şehâdetlerini bizim huzûrumuzda kabûl edip meblağ-ı mezbûr on dokuz buçuk esedî guruşu mezbûr Mercan’dan merkūm Hasan’a hükm eyledi idi biz bu husûsa bu vech üzre şâhidleriz şehâdet dahi ederiz deyû her biri edâ-yı şehâdet-i şer‘iyye eylediklerinde gıbbe ri‘âyet-i şerâiti’l-kabûl şehâdetleri hayyiz-i kabûlde vâki‘ olmağın mezbûr Mercan Ermeni vech-i muharrer üzre mu‘ârazadan men‘ birle mâ hüve’l-vâki‘ bi’t-taleb ketb olundu. Fî 11 Saferi’l-hayr li sene tis‘în ve elf. Şuhûdü’l-hâl: Mehmed Bey b. Ali, Seyfullah Efendi b. Abdurrahman, Ali Çelebi b. Abdurrahim, Dilâver Bey b. Abdullah