Hasköy Mahkemesi 10 Numaralı Sicil (H. 1085 - 1090 / M. 1674 - 1679) cilt: 30, sayfa: 119 Hüküm no: 136 Orijinal metin no: [77-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa b. Mehmed’in yetim oğlu Mehmed için nafaka tayini Havâss-ı Aliyye kazâsına tâbi‘ kasaba-i Hasköy mahallâtından Mahmud Ağa mahallesi sükkânından iken bundan akdem vefât eden Mustafa b. Mehmed’in sulbî sagīr oğlu olup hâlâ vâlidesi bâ‘iset-i hâze’l-kitâb Emine bt. Mehmed nâm hâtunun hacr ve terbiyesinde olan Mehmed nâm sagīrin nafaka ve kisve ve sâir levâzım-ı zarûriyyesi için babası müteveffâ-yı mezbûrdan bi hasebi’l-irsi’ş-şer‘î kendiye intikāl eden emvâlinden vâlidesi mezbûre Emine talebiyle târih-i kitâbdan yevmî beşer akçe nafaka farz ve takdîr olunup meblağ-ı mefrûzu sagīr-i mezbûra sarfa ve [hîn-i] zarûretde istidâne ve vakt-i zaferde sagīr-i mezbûrun kıbel-i şer‘den mansûb vasîsi Osman Efendi b. Ali üzerine rücû‘a kıbel-i şer‘den izin verilmeğin mâ vaka‘a bi’t-taleb ketb olundu. Fî gurreti Rebî‘ilâhir li sene tis‘în ve elf. Şuhûdü’l-hâl: Umdetü’l-müderrisîni’l-kirâm Ebûbekir Efendi b. Abdülbâkī Efendi, Fahrü’l-kuzât Abdülkādir Efendi b. İbrahim Efendi ve huddâm-ı mahkeme-i mezbûre