Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 119 Hüküm no: 80 Orijinal metin no: [17a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bali b. Ramazan’ın kızı Râbia’nın Âmine Hatun’da kalan alacağını terekeden tahsili Efendi hazretleri imzâsıyladır. Mahrûse-i Galata muzâfâtından kasaba-i Beşiktaş’da Yenimahalle’de sâkin iken bundan akdem vefât eden Bali b. Ramazan’ın verâseti sulbiye kızı Râbia nâm hatuna münhasıra olduğu şer‘an sâbit oldukdan sonra mezbûre Râbia meclis-i şer‘-i şerîfde mahrûse-i Galata muzâfâtından Tophane’de Çukurcuma mahallesi ahâlîsinden iken bundan akdem vefât eden Emine bt. el-Hâc Hızır nâm hatunun veresesinden tereke-i vâfiyesin kabz eden zevci el-Hâc Mehmed b. Abdullah nâm kimesne mahzarında üzerine da‘vâ ve takrîr-i kelâm edip müteveffâ-yı mezbûr Bali’nin cihet-i deyn-i şer‘îden müteveffât-ı mezbûre Emine zimmetinde yüz yirmi Riyâlî guruş hakkı olup hattâ müteveffât-ı mezbûre Emine mezbûr Bali’nin vefâtından sonra bin altmış üç Şevvâli’nin altıncı günü Mahmudpaşa Mahkemesi’nde nâibü’ş-şer‘ olan ( ) Efendi huzûrunda benim muvâcehemde ikrâr dahi edip hüccet olundukdan sonra mezbûre Emine hacc-ı şerîfe gidip on iki sene âhar diyârda meks edip ba‘dehû gelip ben dahi habîre olmamış idim. Hâlâ habîre olmağla suâl olunup meblağ-ı mezbûru tereke-i vâfiyesinden bana edâya mezbûr el-Hâc Mehmed’e tenbîh olunmak matlûbumdur deyü mazmûnu min-külli’l-vücûh takrîr-i meşrûhunu nâtıka sicil sûretini ibrâz edicek, gıbbe’s-suâl mezbûr el-Hâc Mehmed müteveffât-ı mezbûre sene-i mezbûrede hacc-ı şerîfe gidip on iki sene âhar diyârda meks etdiğini ikrâr lâkin deyn-i mezbûru inkâr edicek müdde‘iye-i mezbûreden müdde‘âsını mübeyyine beyyine taleb olundukda zeyl-i hüccet-i mezbûrede isimleri terkîm olunan Müslimînden Ömer b. Ramazan ve Mustafa Çelebi b. Hasan nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka müteveffât-ı mezbûre Emine bin altmış üç senesi Şevvâli’nin altıncı günü mahkeme-i mezbûrede müteveffâ-yı mezbûr Bali’ye cihet-i deyn-i şer‘îden zimmetinde vâcibü’l-edâ yüz yirmi riyâlî guruş deyn olduğunu bizim huzûrumuzda müdde‘iye-i mezbûre Râbia muvâcehesinde ikrâr etmiş idi, biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye etdiklerinde ba‘de’t-ta‘dîl ve’t-tezkiye şehâdetleri makbûle olup ve mezbûr el-Hâc Mehmed ikrâr dahi edip müdde‘iye-i mezbûre tahlîf-i şer‘î ile tahlîf olundukdan sonra mûcebince meblağ-ı mezbûr yüz yirmi riyâlî guruşu müteveffâ-yı mezbûre Emine’nin tereke-i vâfiyesinden müdde‘iye-i mezbûreye edâya mezbûr el-Hâc Mehmed’e tenbîh olunmağın mâ-vaka‘a bi’t-taleb ketb olundu. Fi’l-yevmi’s-sâlis aşer min-Cumâdelâhire li-sene ihdâ ve semânîn ve elf. Şuhûdü’l-hâl: Zahrü’l-akrân Derviş Ağa kethüdâ-yı hazret efendi, fahrü’l-eşbâh Mehmed Ağa ser-muhzırân, Mehmed Çelebi b. Abdullah, Mehmed Çelebi b. Sefer, Osman Çavuş b. Mehmed.