Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 120 Hüküm no: 81 Orijinal metin no: [17a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mahmud Çelebi’in Müteferrika Mehmed Ağa’nın para vakfından istiğlâl yoluyla borç alması Hüccet, icâre-i beyt Mahmiye-i İstanbul’da Keçecipîrî mahallesinde sâkin Mahmud Çelebi b. Mehmed nâm kimesne meclis-i şer‘-i hatîr-ı lâzımü’t-tevkīrde mahmiye-i mezbûrede merhûm Müteferrika Mehmed Ağa’nın nukūd-ı mevkūfesine bi’l-fi‘il mütevellî olan işbu bâ‘isü’l-kitâb fahrü’l-hutebâ Hasan Efendi b. Dede mahzarında ikrâr ve takrîr-i kelâm edip silk-i mülkümde münselik olup mahalle-i mezbûrede vâki‘ bir tarafdan Ketenci Ali Beşe mülkü ve bir tarafdan İsmail Çelebi mülkü ve bir tarafdan Mahmud Çelebi mülkü ve bir tarafdan tarîk-i âm ile mahdûd mülk menzilimi cümle tevâbi‘ ve levâhıkı ile mütevellî-i mezbûr Hasan Efendi’ye yetmiş esedî guruşa bi-tarîkı’l-istiğlâl bey‘ ve teslîm edip mûmâ-ileyh Hasan Efendi dahi mâl-ı vakf-ı mezbûr ile iştirâ ve tesellüm ve semen-i mezbûru bana teslîm, ben dahi ahz u kabz etdiğimden sonra menzil-i mezbûru gıbbe’t-tahliyeti’ş-şer‘iyye ve’t-tekābuzü’l-mer‘î târîh-i kitâbdan bir sene tamâmına değin on buçuk esedî guruşa bana îcâr ve teslîm ben dahi minvâl-i muharrer üzere istîcâr ve tesellüm ve kabûl eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’r-râbi‘ aşer min-Cumâdelâhire li-sene ihdâ ve semânîn ve elf. Şuhûdü’l-hâl: Türbedâr Receb Efendi b. ( ), Süleyman Efendi b. Mehmed el-imâm, Mehmed Çelebi b. Mustafa, Kara Ahmed b. Mehmed el-kayyûm, İbrahim Çelebi b. Mehmed.