Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 120 Hüküm no: 82 Orijinal metin no: [17a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vasi İbrahim Çelebi’nin İbrahim Beşe’de olan borcu tahsil ettiği Hüccet-i vesâyet, ibrâ Mahmiye-i İstanbul’da Unkapanı kurbünde Üskübî mahallesinde sâkin iken bundan akdem vefât eden Mustafa b. Hüseyin’in verâseti sulbî sagīr oğlu Ahmed ve sulbiye sagīre kızı İsmihan’a babası müteveffâ-yı mezbûr ile cedleri merhûm-ı mezbûr Hüseyin’den irsen intikāl eden mâllarını hıfz için hâkimü’ş-şer‘ tarafından vasî nasb u ta‘yîn olunan İbrahim Çelebi b. Ramazan nâm kimesne meclis-i şer‘-i şerîfde işbu bâ‘isü’l-kitâb İbrahim Beşe b. el-Hâc Derviş nâm kimesne mahzarında [17b] ikrâr ve takrîr-i kelâm edip mezbûrânın mallarından bundan akdem bin akçe mezbûr İbrahim Beşe’ye ikrâz ve teslîm, ol dahi iktirâz ve tesellüm etmiş idi. Hâlâ meblağ-ı mezbûr bin akçeye mezbûr İbrahim Beşe bana edâ ve teslîm edip ben dahi vesâyetim hasebiyle meblağ-ı mezbûr bin akçeyi ahz u kabz etdiğimden sonra sagīrân-ı mezbûrânın mâllarından merkūm İbrahim Beşe zimmetinde bir akçe hakları ve bir habbe bâkī kalmadı dedikde mâ-vaka‘a bi’t-taleb ketb olundu. Fi’l-yevmi’l-hâmis aşer min-Cumâdelâhire li-sene ihdâ ve semânîn ve elf. Şuhûdü’l-hâl: Abdi Çelebi b. Hüseyin, Şükrullah Bey b. Mustafa, İbrahim Çelebi b. Ahmed, Hasan Çelebi b. Mahmud.