Hasköy Mahkemesi 10 Numaralı Sicil (H. 1085 - 1090 / M. 1674 - 1679) cilt: 30, sayfa: 128 Hüküm no: 148 Orijinal metin no: [83-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Emine bt. Osman’ın evini oğlu Mehmed Çelebi b. Mustafa’ya sattığı Havâss-ı Aliyye kazâsına tâbi‘ kasaba-i Hasköy mahallâtından Turşucu Hüseyin Çelebi mahallesi sâkinelerinden Emine bt. Osman nâm hâtun meclis-i şer‘-i şerîf-i lâzımü’t-teşrîfde sulbî kebîr oğlu işbu sâhibü’l-kitâb Mehmed Çelebi b. Mustafa mahzarında ikrâr ve takrîr-i kelâm edip bey‘-i âti’z-zikrin sudûruna değin silk-i mülk-i sahîhimde münselik olan emlâkimden mahalle-i mezbûrede vâki‘ bir tarafı Haymeci Ahmed Çelebi mülkü ve bir tarafı Fâtıma Hâtun mülkü ve bir tarafı Deli Yani nâm zimmî mülkü ve taraf-ı râbi‘i tarîk-ı hâs ile mahdûd bir bâb tahtânî oda ve üç bâb fevkānî odaları ve su kuyusunu ve zât-ı eşcâr-ı müsmire ve gayrı müsmire bahçeyi ve kenîfi müştemil olan mülk menzilimi cümle tevâbi‘ ve levâhıkı ile oğlum mezbûr Mehmed Çelebi’ye altı bin fıddî râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip ol dahi vech-i muharrer üzre iştirâ ve tesellüm ve kabz eyleyip semeni olan meblağ-ı mezbûr altı bin akçeyi oğlum mezbûr Mehmed Çelebi yedinden bi’t-tamâm ve’l-kemâl alıp kabz eyledim ba‘de’l-yevm menzil-i mahdûd-ı mezkûrda vechen mine’l-vücûh alâka [84] ve medhalim yokdur oğlum mezbûr Mehmed Çelebi’nin mülk-i müşterâsıdır keyfe mâ yeşâ’ ve yahtâr mutasarrıf olsun dedikde mukırra-i mezbûrenin vech-i mübeyyen üzre sudûr eden cemî‘ kelimâtını mezbûr Mehmed Çelebi bi’l-muvâcehe tasdîk ve bi’l-müşâhede tahkīk etmeğin mâ hüve’l-vâki‘ bi’t-taleb ketb olundu. Fi’l-yevmi’s-sâdis min Cumâdelûlâ li sene tis‘în ve elf. Şuhûdü’l-hâl: Ali Efendi b. el-Hâc Mehmed el-İmâm bi mahalle-i mezbûre, Ali Çelebi b. Hüseyin Tabîb, Hüseyin Beşe b. Mehmed, Hüseyin Bey b. İbrahim, İbrahim Beşe b. Halil, Mustafa Kethüdâ b. Ali, Mustafa Halîfe b. Mehmed el-Müezzin, Abdullah b. Dilâver el-Müezzin, Ali b. İbrahim Çelebi