Hasköy Mahkemesi 10 Numaralı Sicil (H. 1085 - 1090 / M. 1674 - 1679) cilt: 30, sayfa: 130 Hüküm no: 151 Orijinal metin no: [85-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Çavuş b. Abdurrahman’ın Yako v. Yahuda’da alacağı olduğu Medîne-i Hazret-i Ebâ Eyyûb el-Ensârî -aleyhi rahmetü rabbihi’l-Bârî-’de Câmi‘-i Kebîr mahallesi sükkânından Mehmed Çavuş b. Abdurrahman tarafından husûs-ı âti’l-beyâna vekîl olup Mehmed Bey b. Ali ve Ali Çelebi b. Abdurrahman şehâdetleriyle şer‘an vekâleti sâbite olan Abdülbâkī Efendi b. Ahmed meclis-i şer‘de Havâss-ı Aliyye kazâsına tâbi‘ kasaba-i Hasköy mahallâtından Kiremitçi Ahmed Çelebi mahallesinde sâkin Yako v. Yahuda nâm Karayî mahzarında üzerine bi’l-vekâle da‘vâ ve takrîr-i kelâm edip müvekkilim mezbûr Mehmed Çavuş’un mezbûr Yako zimmetinde yüz elli yedi kıt‘a esedî guruş hakkı olup ve Yahuda nâm Yahudide olan on guruş hakkına dahi kefîl bi’l-mâl olmağla cihet-i kefâletden dahi on esedî guruş ve bir pîrûze taş bahâsından dahi on sekiz guruş ki cem‘an yüz seksen beş guruş hakkı vardır suâl olunup alıverilmesi matlûbumdur dedikde gıbbe’s-suâl mezbûr Yako fi’l-vâki‘ müdde‘î-i mezbûr Mehmed Çavuş’a vech-i mübeyyen üzre cem‘an yüz seksen beş kıt‘a esedî guruş deynim vardır deyû ikrâr ve i‘tirâf etmeğin mûcebiyle meblağ-ı mezbûrun edâsına tenbîh olundukdan sonra meblağ-ı mezbûra merkūm Yako Yahudinin dâmâdı olup mahalle-i mezbûrede sâkin İlyazer v. Yahuda nâm Yahudi mahfil-i kazâda takrîr-i kelâm edip meblağ-ı merkūm yüz seksen beş guruşa mezbûr Yako Yahudi târih-i kitâbdan üç yüz altmış gün tamâmına değin dâyin-i merkūma edâ etmez ise emr ve kabûlü [86] hâviye kefâlet-i sahîha-i şer‘iyye ile kefîl oldum dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Tahrîren fî evâili şehri Rebî‘ilâhir li sene tis‘în ve elf. Şuhûdü’l-hâl: Hasan Çelebi b. Mustafa, Mehmed Çelebi b. Siyavuş, Şahin Bey b. Abdullah, Mustafa b. Ali, Ali Çelebi b. Abdurrahman, Sabatay v. Mihayil, Salamon v. Paroh, Efendepola v. Avraham, Murdehay v. Salom, Yosef v. Yahuda