Hasköy Mahkemesi 10 Numaralı Sicil (H. 1085 - 1090 / M. 1674 - 1679) cilt: 30, sayfa: 131 Hüküm no: 152 Orijinal metin no: [86-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Çavuş b. Abdurrahman’ın Yako v. Yahuda’daki alacaklarını tahsil ettiği, kaybolan senetlerinin hükümsüz olduğu Medîne-i Hazret-i Ebâ Eyyûb el-Ensârî -radiye anhu Rabbühü’l-Bârî-’de Câmi‘-i Kebîr mahallesinde sâkin Mehmed Çavuş b. Abdurrahman tarafından husûs-ı âti’z-zikre vekîl olup Mehmed Bey b. Ali ve Ali Çelebi b. Abdurrahman şehâdetleriyle şer‘an vekâleti sâbite olan Abdülbâkī Efendi b. Ahmed meclis-i şer‘-i hatîrde Havâss-ı Aliyye kazâsına tâbi‘ kasaba-i Hasköy mahallâtından Kiremitçi Ahmed Çelebi mahallesinde sâkin işbu râfi‘ü’r-rakīm Yako v. Yahuda nâm Karayî muvâcehesinde bi’l-vekâle ikrâr ve takrîr-i kelâm edip müvekkilim mezbûr Mehmed Çavuş’un merkūm Yako ile târih-i kitâba gelince beynlerinde nice ahz ü i‘tâ ve mu‘âmelât-ı şettâ vâkı‘a olmuşdu el-hâletü hâzihî bi’l-cümle hesâblaşıb mezbûr Yahudi zimmetinde bir akçe ve bir habbe hakkı bâkī kalmadı ve merkūm Yako’nun lisânı ve İslâm lisânı üzre imzâ ve hâtemini müştemil deyn ve kefâlet temessükleri ve hücec-i şer‘iyyeleri var idi yedimde zâyi‘ olmağın min ba‘d zikr olunan deyn ve kefâlet ve evkāfa müte‘allik hukūk için hücec ve temessükât zuhûr ederse mûcebiyle amel olunmasın ve ba‘de’l-yevm husûs-ı mezbûra müte‘allik âmme-i de‘âvî ve mütâlebât ve eymân-ı muhâsamâtdan merkūm Yako’nun zimmetini ibrâ-i âm ile ibrâ ve iskāt eyledim ba‘de’l-yevm eğer benden veyâhud vükelâmdan husûs-ı mezbûrenin küllîsine müte‘allik da‘vâ sudûr ederse lede’l-hükkâmi’l-kirâm mesmû‘a olmasın dedi dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Tahrîren fî evâili şehri Rebî‘ilâhir li sene tis‘în ve elf. Şuhûdü’l-hâl: es-Seyyid Ahmed Çelebi b. es-Seyyid Hasan ..?, es-Seyyid Şükrullah ..? b. es-Seyyid Hasan ..?, Süleyman Çelebi b. Ramazan, Abdülkādir Çelebi b. Hasan, el-Hâc Mehmed b. Kalenderî Mehmed Çelebi el-Cündî Ali Çelebi b. Abdurrahman, İbrahim Çelebi b. Dilâver, Mehmed Bey b. Ali Muhtesib, Receb Beşe b. Nasuh, Mehmed Bey b. İvaz sipâh, Mehmed Bey b. Abdi, Ali Çelebi b. Abdurrahman