Hasköy Mahkemesi 10 Numaralı Sicil (H. 1085 - 1090 / M. 1674 - 1679) cilt: 30, sayfa: 132 Hüküm no: 153 Orijinal metin no: [86-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Andonaki v. Manolaki ile kız kardeşi Ezmerağda’nın evlerini anneleri Kasandra bt. Dimitri’ye sattıkları Havâss-ı Aliyye kazâsına tâbi‘ kasaba-i Hasköy mahallâtından Kiremitçi Ahmed Çelebi mahallesi sükkânından Andonaki v. Manolaki nâm zimmî ile kız karındaşı Ezmerağda nâm Nasrâniye meclis-i şer‘-i hatîr-i lâzımü’t-tevkīrde vâlideleri işbu râfi‘atü’r-rakīm Kasandra bt. Dimitri nâm Nasrâniye muvâcehesinde her biri bi’l-asâle ikrâr-ı tâm ve ta‘bîr ani’l-merâm edip ale’l-iştirâk mülk-i mevrûsumuz olup mahalle-i mezbûrede vâki‘ bir tarafı Mihayil v. Yani nâm zimmî mülkü ve bir tarafı Maryola bt. Angeli nâm Nasrâniye mülkü ve bir tarafı [87] sâhil-i bahr ve bir tarafı tarîk-ı âm ile mahdûd ve mümtâz olup tarîk-ı âm tarafından iki bâb fevkānî oda ve bir sofa ve deryâ tarafında dahi iki bâb fevkānî ve iki bâb tahtânî odalar ve matbah ve kiler ve tahtında bir mahzen ve bi’r-i mâ’ havlu ve kenîf ve hâricinde bir bâb kasab dükkânı ve bir bâb ekmekçi dükkânını müştemil mülk menzilimizi cümle tevâbi‘ ve levâhık ve kâffe-i hukūk ve merâfıkı ile vâlidemiz mezbûre Kasandra’ya üç bin iki yüz elli kıt‘a esedî guruşa tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm ol dahi vech-i muharrer üzre iştirâ ve tesellüm eyledikden sonra semeni olan meblağ-ı mezbûr üç bin iki yüz elli esedî guruşu vâlidemiz mezbûre Kasandra yedinden bi’t-tamâm ve’l-kemâl alıp kabz eyledik ba‘de’l-yevm menzil-i mahdûd-ı mezkûr mezbûre Kasandra’nın mülk-i müşterâsıdır keyfe mâ yeşâ’ ve yahtâr mutasarrıfe olsun dediklerinde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sânî ve’l-ışrîn min Cumâdelûlâ li sene tis‘în ve elf. Şuhûdü’l-hâl: Abdülbâkī Efendi b. Ahmed, Receb Beşe b. Nasuh, Süleyman Çelebi b. Ramazan, Mehmed Bey b. Ali, Ali Çelebi b. Abdurrahman, İbrahim Çelebi b. Dilâver, Dilâver Bey b. Abdullah