Hasköy Mahkemesi 10 Numaralı Sicil (H. 1085 - 1090 / M. 1674 - 1679) cilt: 30, sayfa: 132 Hüküm no: 154 Orijinal metin no: [87-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Musa Bey b. Mehmed Paşa’nın ölen Kandan v. Ferkarabet’te kalan kira alacağını talep ettiği, Kandan’ın borçlu olarak öldüğü ve geride malı kalmadığı Mahrûse-i Galata müzâfâtından kasaba-i Kasımpaşa mahallâtından Kulaksız mahallesi sükkânından fahrü’l-eşbâh Musa Bey b. el-merhûm Mehmed Paşa meclis-i şer‘-i hatîr-i lâzımü’t-tevkīrde mahmiye-i İstanbul’da Kumkapı dâhilinde Paşa mahallesi sükkânından Avadik v. Ferkarabet nâm Ermeni mahzarında üzerine da‘vâ ve takrîr-i kelâm edip mezbûr Avadik’in karındaşı Kandan nâm Ermeni babam müteveffâ-yı mezbûrun Havâss-ı Aliyye kazâsına tâbi‘ kasaba-i Hasköy’de vâki‘ kiremithânesinde müste’cir olup icâre-i mezbûreden zimmetinde otuz bin akçe bâkī kalmağla kable’l-edâ hâlik oldukda evlâd-ı sıgārına karındaşı mezbûr Avadik taraf-ı şer‘den vasî nasb ve ta‘yîn olunmağla vesâyeti hasebiyle meblağ-ı mezbûru hâlik-i merkūmun tereke-i vâfiyesinden taleb ederim suâl olunsun dedikde gıbbe’s-suâl mezbûr Avadik cevâbında fi’l-vâki‘ karındaşım mezbûr Kandan hâlik oldukda hâkimü’ş-şer‘ beni evlâd-ı sıgārının tesviye-i emirlerine vasî nasb edip ben dahi vesâyet-i mezbûreyi kabûl ve merâsimini edâya ta‘ahhüd etmişdim lâkin hâlik-i mezbûrun cemî‘ terekesi düyûnuna vefâ etmeyip dâyinleri beyninde taksîm-i guremâ olunmağla her birlerine nasîb-i guremâları teslîm olunup yedimde muhallefât-ı mezbûrdan bâkī bir şey kalmamışdır deyû bin yetmiş altı târihinde kasaba-i Hasköy’de nâibü’ş-şer‘i’ş-şerîf olan Mustafa Efendi imzâsıyla mümzâ ve hâtemiyle mahtûm hüccet-i şer‘iyye ibrâz etmeğin gıbbe’t-tasdîki’ş-şer‘î müdde‘î-i mezbûr Musa Bey bî-vech mu‘ârazadan men‘ olunup mâ vaka‘a bi’t-taleb ketb [88] olundu. Fi’l-yevmi’l-hâmis ve’l-ışrîn min Cumâdelûlâ li sene tis‘în ve elf. Şuhûdü’l-hâl: Ali Çelebi b. Mehmed Hallâk, diğer Ali Çelebi b. Abdurrahman Muhzır, İbrahim Çelebi b. Dilâver Muhzır, Mehmed Bey b. Ali