Hasköy Mahkemesi 10 Numaralı Sicil (H. 1085 - 1090 / M. 1674 - 1679) cilt: 30, sayfa: 133 Hüküm no: 155 Orijinal metin no: [88-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hamya bt. İlya’nın boşandığı kocası Menahem v. Mosi’deki alacaklarını talep ettiği, bir yıl vade tanındığı ve Menahem’in babasının kefil olduğu Husûs-ı âti’l-beyânın mahallinde tahrîri iltimâs olunmağın bu fakīr zeyl-i vesîkada muharrerü’l-esâmî olan müslimîn ile Havâss-ı Aliyye kazâsına tâbi‘ kasaba-i Hasköy’de Kiremitçi Ahmed Çelebi mahallesinde sâkine olan Hamya bt. İlya nâm Yahudiyenin sâkin olduğu menzile varıp akd-i meclis-i şer‘-i hatîr olundukda mezbûre Hamya tarafından vekîl olup bimâ hüve nehcü’s-sübût şer‘an vekâleti sâbite olan Mehmed Çavuş b. Abdurrahman meclis-i ma‘kūd-ı mezbûrda merkūme Hamya’nın zevc-i mutallıkı işbu râfi‘ü‘r-rakīm Menahem v. Mosi nâm Yahudi mahzarında bi’l-vekâle üzerine da‘vâ ve takrîr-i kelâm edip müvekkilem mezbûre Hamya’nın merkūm Menahem zimmetinde mütekarrir ve ma‘kūdun aleyh olan yüz yirmi beş kıt‘a esedî guruş mehr-i müecceli ve bin iki yüz akçe nafaka-i iddet ve me’ûnet-i süknâsı ve cihet-i karz-ı şer‘îden dahi elli kıt‘a esedî guruş ve üç aded hâtem bahâsından dahi sekiz buçuk guruş ki cem‘an mezbûr Menahem zimmetinde yüz doksan üç buçuk guruş hakkı olup taleb eylediğinde edâdan imtinâ‘ eder suâl olunup meblağ-ı mezbûrun alıverilmesi bi’l-vekâle matlûbumdur dedikde gıbbe’s-suâl mezbûr Menahem cevâbında fi’l-vâki‘ yüz yirmi beş kıt‘a esedî guruş mehr-i müeccel ve bin iki yüz akçe nafaka ve cihet-i karz-ı şer‘îden dahi elli kıt‘a esedî guruşu ikrâr ancak sekiz buçuk guruşa üç aded hâtemi inkâr etmekle müdde‘iye-i mezbûreden beyyine taleb olundukda ityân-ı beyyineden izhâr-ı acz edip istihlâf etmeğin müdde‘iye-i mezbûre Hamya’dan sekiz buçuk guruşa üç aded hâtem almadığına mezbûr Menahem’e yemîn teklîf olundukda nükûl etmeğin cem‘an meblağ-ı mezbûr yüz doksan üç buçuk guruşu edâya mezbûr Menahem’e tenbîh olundukdan sonra mezbûr Menahem’in babası Hayim v. Menahem nâm Yahudi meclis-i ma‘kūd-ı mezbûrda meblağ-ı mezbûr yüz doksan üç buçuk guruşa emr ve kabûlü hâviye kefâlet-i sahîha-i şer‘iyye ile kefîl oldum dedikde müdde‘iye-i mezbûre Hamya dahi meblağ-ı mezbûru târih-i kitâbdan üç yüz altmış gün tamâmına değin taleb etmemeğe ta‘ahhüd etmeğin mâ hüve’l-vâki‘ bi’t-taleb ketb olundu. Tahrîren fi’l-yevmi’r-râbi‘ ve’l-ışrîn min Cumâdelûlâ li sene tis‘în ve elf. Şuhûdü’l-hâl: İsmail Efendi b. Ömer el-İmâm, Bekir Beşe b. Nasuh, Ali Çelebi b. Abdurrahman, Dilâver Bey b. Abdullah, İbrahim Çelebi b. Dilâver