Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 121 Hüküm no: 83 Orijinal metin no: [17b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Gül’ün kiracıları aleyhlerindeki hırsızlık iddiasından men olunması Hüccet, sirkadan tahlîf Mahmiye-i İstanbul’da Ohri? mahallesi sâkinelerinden Gül bt. Mahtger? nâm Nasrâniye meclis-i şer‘-i şerîf-i lâzımü’t-tevkīrde işbu ashâbü’s-sifr Lamberi bt. Todori ve Frisa bt. Taranoz nâm Nasrâniyeler ve mezbûre Lamberi’nin zevci Tanaş v. Anderya nâm zimmî muvâcehelerinde üzerlerine da‘vâ ve takrîr-i kelâm edip mezbûrûnun mahalle-i mezbûrede vâki‘ sâkin oldukları menzillerinde müste’cir olup sâkin iken târîh-i kitâbdan iki ay mukaddem zikr olunan menzilimde gece ile eşyâmdan iki buçuk esedî guruş kıymetli bir miskāl incim ve on sekiz aded Frengî altınım ve bir ikişerlik Frengî altınımı mezbûrûn hufyeten ahz u kabz eylemişlerdi. Hâlâ zikri mürûr eden eşyâmı mezbûrûndan taleb ederim, suâl olunsun dedikde gıbbe’s-suâl ve akībe’l-inkâr müdde‘iye-i mezbûreden müdde‘âsına mutâbıka beyyine taleb olundukda ityân-ı beyyineden izhâr-ı acz ile istihlâf etmeğin mezbûrûn Lamberi ve Frisa ve Tanaş’dan her birine zikr olunan eşyâları târîh-i mezbûrda müdde‘iye-i mezbûrenin sâkin olduğu menzilinden hufyeten ahz u kabz etmediklerine yemîn teklîf olundukda onlar dahi alâ-vefki’l-mesûl yemîn billâhillezî enzele’l-incîle alâ-Îsâ -aleyhi’s-selâm- etmeleriyle mûcebince müdde‘iye-i mezbûre Gül bî-vech ta‘arruzdan men‘ birle mâ-vaka‘a bi’t-taleb ketb olundu. Fi’l-yevmi’s-sâmin aşer min-Cumâdelâhire li-sene ihdâ ve semânîn ve elf. Şuhûdü’l-hâl: Şükrullah Bey b. Mustafa, Mustafa Çelebi b. el-Hâc Ahmed, Köse Ahmed b. Abdülcabbar, Muharrem b. Mehmed, Hasan Çelebi b. Mahmud.