Hasköy Mahkemesi 10 Numaralı Sicil (H. 1085 - 1090 / M. 1674 - 1679) cilt: 30, sayfa: 138 Hüküm no: 161 Orijinal metin no: [92-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Edirne’deki Karayî cemâatine mensup fakir Yahudiler için kurulan para vakfından verilen ödünçlerin Mosi v. Avraham’dan talep edildiği Havâss-ı Aliyye kazâsına tâbi‘ kasaba-i Hasköy’de el-Hâc Şaban mahallesinde vâki‘ tâife-i Yahudadan Erhandepola nâm Yahudiyenin evlâd-ı evlâd-ı evlâdına ve ba‘de’l-inkırâz Karayî tâifesinden olup Edirne cemâ‘ati Yahudileri fukarâsına meşrûta nukūdun bi’l-fi‘l mütevellîsi olan râfi‘ü’l-kitâb Mehmed Çavuş b. Abdurrahman meclis-i şer‘-i hatîr-i lâzımü’t-tevkīrde cemâ‘at-i mezbûreden Mosi v. Avraham nâm Yahudi mahzarında üzerine da‘vâ ve takrîr-i kelâm edip sâbıkan mütevellî olan Halef v. Yasef nâm Yahudiden zimem kabz eylediğim asl-ı mâl-ı vakıfdan mezbûr Mosi ile gāibûn ani’l-meclis Paroh v. Salamon ve İlya v. Paroh ve Yahuda v. Mosi ve Mosi v. Halef ve sâir cemâ‘at-i merkūmeden elli nefer kimesne zimmetlerinde onu on bir olmak hesâbı üzre altı yüz esedî guruş olup ahadühümâ âharın zimmetine lâzım gelen meblağa emr ve kabûlü hâviye kefâlet-i sahîha-i şer‘iyye ile kefîl olmuşlar idi hâlâ meblağ-ı mezbûru asâlet ve kefâletine binâen mezbûr Mosi’den taleb ederim suâl olunsun dedikde gıbbe’s-suâl mezbûr Mosi cevâbında fi’l-vâki‘ asl-ı mâl-ı vakf-ı mezbûrdan benim ve gāibûn ani’l-meclis mezbûrûn Paroh ve İlya ve Yahuda ve Mosi ve sâir cemâ‘at-i merkūmeden elli nefer kimesne zimmetlerinde meblağ-ı mezbûr altı yüz kıt‘a esedî guruş olmağla minvâl-i muharrer üzre ahadühümâ âharın zimmetine lâzım gelen meblağa emr ve kabûlü hâviye kefâlet-i sahîha-i şer‘iyye ile kefîl olduk deyû bi tav‘ihî ikrâr ve i‘tirâf etmeğin alâ mûceb-i ikrârihî asâlet ve kefâletine binâen meblağ-ı mezbûru mütevellî-i merkūma edâya mezbûr Mosi’ye tenbîh birle mâ vaka‘a bi’t-taleb ketb olundu. Fi’l-yevmi’s-sânî ve’l-ışrîn min Cumâdelâhire li sene tis‘în ve elf. Şuhûdü’l-hâl: Mehmed Bey b. Ali, Süleyman Çelebi b. Ramazan, Mehmed Çelebi b. Siyavuş, Mustafa Çelebi b. Dilâver, Mahmud Çelebi b. Mehmed, Mustafa b. Murad, Ali Çelebi b. Abdurrahman, Abdülbâkī b. Ömer, İbrahim Çelebi b. Dilâver, Dilâver Bey b. Abdullah