Hasköy Mahkemesi 10 Numaralı Sicil (H. 1085 - 1090 / M. 1674 - 1679) cilt: 30, sayfa: 139 Hüküm no: 163 Orijinal metin no: [93-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kostantin v. Behar’a Kiremitçi Ahmed Çelebi mahallesinde yeni fırın açması için izin verildiği Havâss-ı Aliyye kazâsına tâbi‘ kasaba-i Hasköy’de Kiremitçi Ahmed Çelebi mahallesi sükkânından Kostantin v. Behar nâm zimmî meclis-i şer‘-i hatîr-i lâzımü’t-tevkīrde takrîr-i kelâm ve ta‘bîr ani’l-merâm edip sâkin olduğum mahalle-i mezbûrenin ekmekçi fırınına kemâl mertebe ihtiyâcı olmağla kendi malımdan müceddeden ekmekçi fırını binâ etmeyi murâd etmiş[im]dir kıbel-i şer‘den üzerine varılıp keşf ve tahrîr ve müceddeden binâya izin verilmek matlûbumdur dedikde bu fakīr üstâd hâssa mi‘mârlardan Mehmed Bey b. Abdullah ve Üstâd Mustafa b. İbrahim ve ahâlî-i mahalleden Mustafa Efendi b. Ramazan ve Ali Efendi b. Mehmed ve Hüseyin Ağa b. Muharrem ve Mustafa Beşe b. Ali ve Mustafa Çelebi b. Bayram ve Hasan b. Abdullah ve Ahmed Ağa b. Bâli ve Mehmed b. Yusuf ve Ahmed b. Mehmed ve Mehmed b. Hüseyin ve el-Hâc Ali Ağa b. Abdullah ve İbrahim b. Abdünnebi ve Ahmed b. Mehmed ve Fazlullah b. Sevindik ve Mustafa Beşe b. Hüseyin ve Mehmed Bey b. Murtaza ve Ahmed b. İsmail ve Mehmed b. Ahmed ve Mehmed b. Abdullah ve Hüseyin b. Ahmed ve Ahmed b. İbrahim ve Şaban b. Hüseyin ve Ali b. Abdullah ve Mustafa Beşe b. Mehmed ve Hüseyin Beşe b. Ahmed ve Ali b. Mehmed ve Mehmed Bey b. Ali ve el-Hâc Halil b. Abdünnebi ve İbrahim Çelebi b. Dilâver ve Ali Çelebi b. Abdurrahman ve sâir ebniye ve sukūf ahvâline ıttılâ‘ı olan bî-garaz müslimîn ile zikr olunan mahalle varıp keşf ve mu‘âyene eylediklerinde fi’l-hakīka mahalle-i mezbûrenin ekmekçi fırınına kemâl mertebe ihtiyâcı olup ve ibâ[du]llâha her vechile enfa‘ olduğunu ahâlî-i mahalle-i mezbûre ve mi‘mârân-ı mezbûrân haber vermeğin zikr olunan fırını müceddeden binâya taraf-ı şer‘den mezbûr Kostantin’e izin verilmeğin mâ hüve’l-vâki‘ bi’t-taleb ketb olundu. Fi’l-yevmi’l-hâmis ve’l-ışrîn [94] min Cumâdelâhire li sene tis‘în ve elf. Şuhûdü’l-hâl: Mehmed Çelebi b. İbrahim, İbrahim Çelebi b. Dilâver, Mehmed Bey b. Ali, Abdülbâkī b. Ömer, Dilâver Bey b. Abdullah