Hasköy Mahkemesi 10 Numaralı Sicil (H. 1085 - 1090 / M. 1674 - 1679) cilt: 30, sayfa: 140 Hüküm no: 164 Orijinal metin no: [94-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hayim v. Yuda’nın Rus asıllı câriyesi Canpâre’yle azatlık sözleşmesi (mükâtebe) yaptığı Havâss-ı Aliyye kazâsına tâbi‘ kasaba-i Hasköy mahallâtından Kiremitçi Ahmed Çelebi mahallesi sükkânından Hayim v. Yuda nâm Yahudi tarafından husûs-ı âti’z-zikre vekîl olup Abdülbâkī Efendi b. Ahmed ve Süleyman Çelebi b. Ramazan şehâdetleri ile şer‘an vekâleti sâbite olan Receb Beşe b. Nasuh meclis-i şer‘-i hatîr-i lâzımü’t-tevkīrde müvekkil-i mezbûrun câriye-i memlûkesi işbu orta boylu açık kaşlı gök elâ gözlü Rûsiyyetü’l-asl râfi‘at-i hâze’l-kitâb Canpâre bt. Yuvan muvâcehesinde bi’l-vekâle ikrâr ve takrîr-i kelâm edip müvekkilim mezbûr Hayim mevsûfe-i mezbûre Canpâre’yi bin doksan senesi Muharremü’l-harâmı gurresinden sekiz seneye değin bilâ hıyânetin velâ ibâk hizmet etmek üzre kitâbete kesip senesi tamâm oldukda âzâd olup sâir harâir-i asliyyât gibi hürre olsun dedi dedikde mevsûfe-i mezbûre Canpâre dahi bi’l-muvâcehe kitâbet-i mezbûreyi kabûl ve hizmet-i lâzımesini edâya ta‘ahhüd ve il[ti]zâm etmeğin gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâdis ve’l-ışrîn min Cumâdelâhire li sene tis‘în ve elf. Şuhûdü’l-hâl: Mahmud Çelebi b. Mehmed, El-Hâc Ali Ağa b. Abdullah çorbacı, Abdülbâkī b. Ömer, Dilâver Bey b. Abdullah, Ali Çelebi b. Abdurrahman, İbrahim Çelebi b. Dilâver