Hasköy Mahkemesi 10 Numaralı Sicil (H. 1085 - 1090 / M. 1674 - 1679) cilt: 30, sayfa: 140 Hüküm no: 165 Orijinal metin no: [94-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Rahime bt. Abdullah’ın zevci Ahmed b. Mehmed ile muhâlaa ile boşandıkları Havâss-ı Aliyye kazâsına tâbi‘ kasaba-i Hasköy mahallâtından el-Hâc Şaban mahallesi sâkinelerinden Rahime bt. Abdullah nâm hâtun meclis-i şer‘-i şerîf-i şâmihü’l-imâd ve mahfil-i dîn-i münîf-i râsihü’l-evtâdda zevc-i muhâlı‘ı hâfız-ı hâze’l-kitâb Ahmed b. Mehmed nâm kimesne mahzarında bi tav‘ihâ ikrâr ve i‘tirâf edip zevcim mezbûr Ahmed ile beynimizde adem-i zindegânemiz olmağın zimmetinde mütekarrir ve ma‘kūdun aleyh olan üç yüz akçe mehr-i müeccelimden ve nafaka-i iddet-i mu‘ayyenem ve me’ûnet-i süknâmdan fâriğa olmak üzre zevcim mezbûr Ahmed ile muhâla‘a-i sahîha-i şer‘iyye ile hul‘ edip ol dahi vech-i muharrer üzre hul‘-ı mezbûru kabûl eylediğinden sonra mezbûr Ahmed’in zimmetini zevciyyete ve gayra müte‘allika âmme-i de‘âvîden ibrâ ve iskāt eyledim ba‘de’l-yevm eğer benden asâleten veya vükelâmdan vekâleten husûs-ı mezbûra müte‘allik da‘vâ sudûr ederse lede’l-hükkâmi’l-kirâm mesmû‘a ve makbûle olmasın dedikde mukırra-i mezbûrenin vech-i muharrer üzre sâdır olan ikrârını [95] mezbûr Ahmed bi’l-muvâcehe tasdîk ve bi’l-müşâhede tahkīk etmeğin mâ hüve’l-vâki‘ bi’t-taleb ketb olundu. Fi’l-yevmi’s-sâdis ve’l-ışrîn min Cumâdelâhire li sene tis‘în ve elf. Şuhûdü’l-hâl: El-Hâc Ali Ağa b. Abdullah çorbacı, Mahmud Çelebi b. Mehmed, Süleyman Çelebi b. Ramazan, Ali Çelebi b. Abdurrahman, Mehmed Beşe b. Ali, Abdülbâkī b. Ömer